ХАХНХЯ-аас Хүүхдийн эрхийн тухай хуулийн шинэчилсэн найруулга, Хүүхэд хамгааллын тухай хуулийн төслүүдийг Засгийн газраар дэмжүүлж, УИХ-аар хэлэлцүүлж эхлээд байна. Энэ хүрээнд Хүүхэд, гэр бүлийн хөгжил, хамгааллыг дэмжих УИХ дахь лобби бүлгээс санаачлан “Хүүхдийн эрхийн ногоон карт” аяныг орон даяар өрнүүлсэн билээ. Уг аяны хүрээнд иргэд олон нийтээс хүүхэд хамгаалал болон хүүхдийн эрхтэй холбоотой асуудлаар маш олон санал, зөвлөмж ирсэн гэдгийг Хүүхэд, гэр бүлийн хөгжил, хамгааллыг дэмжих УИХ дахь лобби бүлгийн ахлагч С.Одонтуяа гишүүн мэдэгдлээ.

Тодруулбал, орон даяар явуулсан уг хэлэлцүүлэгт 19 аймаг, 9 дүүргийн Хүүхэд гэр бүлийн хөгжлийн хэлтэс, төв болон бусад төрийн байгууллага, хүүхдийн эрх, хөгжил, хамгааллын чиглэлээр үйл ажиллагаа явуулдаг төрийн бус байгууллага, олон улсын байгууллага, иргэд, олон нийтээс нийт 7.760, давхардсан тоогоор 21.964 орчим санал иржээ.

Одоогийн байдлаар :

• 32,5% буюу 7.135 санал Хүүхдийн эрхийн тухай хуулийн төсөлд
• 67,5% буюу 14.829 санал Хүүхэд хамгааллын тухай хуулийн төсөлд хамаарахаар санал аж.

УИХ-аар хэлэлцэгдсэн хуулийн төслүүдэд мэргэжлийн хүмүүс, байгууллага, иргэд олон нийтээс хангалттай санал авдаггүй хэмээн байнгын шүүмжлэлд өртдөг. Харин хүүхдийн асуудал дээр ийм олон санал ирсэн нь нэг төрлийн рекорд бөгөөд монголчууд хүүхдийн эрхэд ямар ихээхэн анхаарал тавьж байгаа нь харагдаж байна. Би энэ бүх санал санаачилгуудыг хуульд тусгахын төлөө хариуцлагтай ажиллах болно гэж С.Одонтуяа гишүүн хэллээ.

Хэлэлцүүлэг энэ сарын 25-ны өдөр дуусах юм байна.

Т.Энхэлээ