НҮБ-ын өдрийг өчигдөр дэлхийн нийт тэмдэглэн өнгөрүүлэв.
1945 оны 10 дугаар сарын 24-нд НҮБ-ын дүрэм хүчин төгөлдөр болон үйлчилж эхэлснээр Нэгдсэн Үндэстний Байгууллагын түүх эхэлсэн гэж үздэг.
Дэлхийн бүх улс үндэстнийг нэгтгэсэн энэ байгууллага үүсэн байгуулагдсанаас хойш 70 жилийн ой дээр тохиож байгаа энэ удаагийн НҮБ-ын өдрийг тохиолдуулан Нью-Йорк хотод байрлах НҮБ-ын төв байр, түүнчлэн дэлхийн 60 орчим орны 200-гаад барилга байшин өчигдрөөс эхлэн энэ байгууллагын нэрийн хуудас болсон цэнхэр өнгөөр гэрэлтэж байв.
Эдгээр 200 орчим барилгын дотор Египетийн пирамид, Парисын Эйфелийн цамхаг, Нью-Йорк хотын Эмпайр-Стэйт-Билдинг, мөн Хятадын цагаан хэрэм, Йордан дахь эртний хот Петра, Оросын Эрмитажийн музей, Бразил дахь Христийн хөшөө бүгд цэнхэр гэрлээр чимж, НҮБ-д баяр хүргэж байлаа. НҮБ-ын Ерөнхий Ассамблейн гишүүн 193 улс тус баярын өдрийн өмнөхөн НҮБ-д үзүүлэх итгэл найдвар, хойч үеийнхнээ дайны гашуун зовлонгоос авран хамгаалах НҮБ-ын шийдмэг зорилтыг бататгасан тунхаглалыг нэгэн дуугаар баталсан байна.
Энэ тунхагт, НҮБ-ын бүх гишүүн орон хэл, соёл, шашин шүтлэгийн ялгаа заагийг үл харгалзан өнөөдөр ч гэсэн 70 жилийн өмнөх шигээ нэгдмэл байгааг зарлан тунхаглажээ. НҮБ-ын ерөнхий нарийн бичгийн дарга Пан Ки Мун Ерөнхий ассамблейд хэлсэн үгэндээ НҮБ үүсэн байгуулагдсанаасаа хойшхи 70 жилд сая сая хүнд эрх чөлөө авчирч, колоничлолыг үгүй хийн, апартейдийг халж, арьс өнгө, шашин шүтлэг, үндэс угсаа, хүйс, хүйсийн чиг хандлагыг үл харгалзан хүний эрхийг хангахад хүчин тусалсаныг онцлон тэмдэглэсэн байна.
Гэвч тоо томшгүй олон хүн, тэр дундаа охид эмэгтэйчүүд хүчирхийлэл, зүй бус харьцаа, ядуурал, өвчинд нэрвэгдэн шаналсан хэвээр байгааг бас дурдаад НҮБ-гүйгээр дэлхий дахины нөхцөл үүнээс хүнд хүчир байх байсныг тэмдэглэжээ. Энэ өдрүүдэд НҮБ-ын өдөрт зориулсан жил тутмын концерт зохион байгуулагдаж байна. НҮБ-ын өдрийг анх 1948 оноос эхлэн тэмдэглэж эхэлсэн түүхтэй юм.
