УИХ дахь АН-ын бүлэг өнөөдрийн хуралдаанаараа таван асуудлыг хэлэлцсэн байна. Тус бүлэг уламжлал ёсоор Ерөнхий сайд болон УИХ-ын даргын мэдээллийг сонсчээ. Мөн 2015 оны Төсвийн тодотгол, 2016 оны Төсвийн төслийг хэлэлцэх байсан ч ажлын хэсгээс уг асуудлыг дахин нягталж хэлэлцэх шаардлагатай гэж үзсэн учир хойшлуулжээ. Бүлгээр хэлэлцсэн дараагийн асуудал нь Ялтан шилжүүлэх тухай Европын зөвлөлийн конвецид нэгдэх хуулийн төсөл байжээ. Тус бүлэг уг асуудлыг хэлэлцээд дэмжжээ. Үүний дараа Ерөнхийлөгч Ц.Элбэгдоржийн өргөн мэдүүлсэн Монгол улс байнгын төвийг сахих орон болох төслийг хэлэлцээд Аюулгүй байдлын байнгын хороогоор хэлэлцүүлсний дараа хэлэлцэх нь зүйтэй гэдэгт санал нэгдсэн байна. 

АН "Эдийн засгийн хүндрэлийг даван туулах богино хугацааны бодлого"-ыг санаачлан хэрэгжүүлэхээр болсон талаараа энэ үеэр сэтгүүлчдэд дуулгалаа. Уг асуудал болон бүлгээр хэлэлцсэн бусад асуудлуудын талаар УИХ-ын дарга З.Энхболд болон тус бүлгийн дарга Б.Гарамгайбаатар, дэд дарга С.Одонтуяа нар мэдээлэл хийлээ. 

Эдийн засгийн сэргээх богино хугацааны бодлогын талаар УИХ-ын дарга З.Энхболд ярихдаа “Томоохон төслүүд явуулж авто зам, төмөр зам баръя гэхээр боловсон хүчин байдаггүй. Гадны орноос ажиллах хүчнийг авдаг. Одоо үүнийгээ болиод дотоодоосоо мэргэжилтэй хүмүүсээ авъя. Ингэхийн тулд цэргийн албаа ашиглъя. Төмөр замын цэрэг, барилгын цэргээс цэргүүдийг авъя гэж байгаа юм” гэлээ.

Дээрх цэргийн ангийн цэргүүдийг одоогоор санхүүгийн асуудал нь шийдэгдээд буй Гашуун сухайт, Сайншанд, Бичигтийн чиглэлийн төмөр замыг тавихад ажиллуулах юм байна. Эдгээр төмөр замуудыг барихад 10.000 ажиллах боловсон хүчин хэрэгтэйг УИХ-ын дарга З.Энхболд хэлж байна.

29 нас хүртэлх 180.000 мянган ажил хайдаггүй, сургуульд сурдаггүй, эцэг эхээрээ тэжээлгэдэг залуус байдаг байна /Хөдөлмөрийн яамны судалгаа/. Үүний 50 хувь нь эрэгтэйчүүд байдаг аж. Тэгэхээр 90  залуу мянган цэрэгт явах боломжтой аж. Эдгээр залуусыг төмөр зам тавих бүтээн байгуулалтын  ажилд дайчлах юм байна.

Уг ажлыг Хөдөлмөрийн яам, Батлан хамгаалахын яам хамтарч зохион байгуулах аж. Залуус МСҮТ-д сурч мэргэжилтэй болохын сацуу төмөр замын ажилд цалинтай ажиллах аж. Мөн цэрэг, эх оронч үзэлтэй болж хөдөлмөрөөр хүмүүжих сайн талтай гэж УИХ-ын дарга З.Энхболд хэлж байна.

Ажилчдад өгөх цалин нь улсын төсөвт ачаалал үүсгэхгүй гэж АН-ын бүлэг үзжээ. 

Т.Хулан