Орон сууцны тухай хуулийн 17-р зүйлд тухайн орон сууцны төлөвлөлтийг өөрчлөх, аюулгүй байдлын норм зөрчихийг хориглосон байдаг. Гэтэл энэ нь бодит байдал дээр хэрэгжихгүй байгааг БГД-ийн 67-р байрны оршин суугчид хэлж байна. Учир нь тус байрны 1-2 давхрыг хууль зөрчин өргөтгөж эхэлжээ. Тодруулбал, тус байрны нийтийн эзэмшилд байх ёстой хоёрдугаар давхарын тагтыг нэгэн иргэн худалдан авч өргөтгөл бариулж эхэлсэн байна.

Энд СӨХ юу хийж байв, хууль зөрчөөд байхад юу ч болоогүй юм шиг байна гэж оршин суугчид шүүмжилж байгаа юм. Орон сууцны тухай хуулиар оршин суугчдын нийтлэг эрх ашгийг хамгаалсан байдаг. Өөрөөр хэлбэл хэн дуртай нь өргөтгөл барих ёсгүй. Хуулиар энэ нь хориотой гэдгийг НЗАА-ны ахлах мэргэжилтэн н.Эрдэнэбат хэлж байна.

Хуулиар хориглосон ийм үйлдлийг тухайн дүүргийн мэргэжлийн хяналт нь таслан зогсоох үүрэг хүлээдэг. Тэд ажлаа хийхийг энэ байрны оршин суугчид хүсч байна. Хэрвээ таны амьдарч байгаа орон сууцыг хэн дуртай нь өргөтгөөд байвал харъяа дүүргийнхээ Мэргэжлийн хяналтад хандаж, асуудлыг хуулийн дагуу шийдүүлэх эрх нь иргэн бүрт байгааг НЗАА-аас сануулж байна.

Т.Энхэлээ