"Монгол байгаль дэлхийд ганц" ТББ-аас дөнгөж сая “Гацууртын орд ба шантаажлагчид” сэдвээр хэвлэлийн бага хурал хийсэн талаар бид мэдээлсэн. Тус бүлгэмийнхэн Сэлэнгэ аймгийн Мандал сумын Ноён уулын Гацууртын аманд очиж нөхцөл байдалтай танилцаад иржээ.

Тэдний хэлснээр Ноён ууланд 580 гаруй гар аргаар алт олборлогчид буюу нинжа нар байгаа бөгөөд тэд 80 цооног гаргасан аж.  Тэнд байдал өдөр ирэх бүр дордож нинжа нарын эмх замбараагүй байдал нь эрүүгийн гэмт хэрэг гарах нөхцөлийг бүрдүүлсэн байгааг ч тэд дуулгасан юм.  Тиймээс энэ эмх замбараагүй байдлыг таслан зогсоож, түүхийн үнэт дурсгал бүхий уг газрыг хамгаалалтдаа авч, нинжа нарыг гаргаж өгөхийг  холбогдох төрийн байгууллагуудад санал хүсэлтээ "Монгол байгаль дэлхийд ганц" ТББ-аас удаа дараа хүргүүлжээ. Мөн Ноён  уулыг хамгаална хэмээн цээжээ дэлдэж, өлсгөлөн зарлаж байсан иргэний нийгмийн байгууллагууд  нинжа нарын байгаль орчиныг сүйтгэж байгаа асуудалд яагаад дуугүй сууж байгааг ч гайхаж байна хэмээн тус ТББ-ынхан  хэлсэн юм.

Харин энэ үеэр “Босоо хөх Монгол”  хөдөлгөөний 30 гаруй залуус  мэдээлэл хийж буй "Монгол байгаль дэлхийд ганц" ТББ-ынхныг буруутгаж, эмх замбараагүй байдал үүсгэсэн. Тэд  “Монгол хүн хэзээ ч Ноён уулыг  ухуулая гэж ярихгүй,  та нар бол  эрлийз, Казак хүмүүс байна, хэний захиалгаар ийм зүйл ярьж байгаа юм бэ? Ард чинь хэн байгаа юм, С.Баярцогтоос мөнгө авсан уу” гэх мэт үгээр дайрч байлаа. Ийн “Босоо хөх Монгол” ТББ-ын залуус  бид иргэний нийгмийн байгууллага төр засагт шаардлага хүргүүлж ажилладаг, нинжа нартай тэмцэх албагүй гэх зүйлийг ярьж, хэвлэлийн хурлын танхимд хараалын үг хэлж, сэтгүүлчдэд ажлаа хийх боломж  олгохгүй, эмх замбараагүй байдал үүсгэсэн юм. 

Д.Ундрах /24tsag.mn/