Сонсголонгийн хуучин замыг арматурчлалтай бетон хучилттай даацын зам болгож албан ёсоор өнөөдөр ашиглалтад орууллаа. 

Тус замыг өргөтгөн шинэчлэх ажлыг “Гудамж” төслийн захиалгаар үндэсний шилдэг компаниуд болох "Бадрах Ойл" ХХК, "Ар Суварга" ХХК амжилттай гүйцэтгэж ийнхүү хүлээлгэн өгсөн байна.  

Энэхүү замын нийт урт нь “Монос”-ын уулзвараас Нисэх-Яармагийн уулзвар хүртэл 5.5 км бөгөөд тус бүр 3.5 м өргөн 4 эгнээ бүхий зорчих хэсэгтэй, зорчих хэсгийн 2 талаар 0.5 м өргөн аюулгүйн зурвас, замын тэнхлэгээр 1 м өргөн тусгаарлах зурвас, замын хоёр талаар 1.5х2 м өргөн явган хүний зам, мөн дугуйн замтай болжээ.

Хуучин зам нь 7 м өргөн зорчих хэсэгтэй 1.5х2 м өргөн хайрган хөвөөтэй нийт 10 м өргөн байсан бол шинэ төлөвлөлтөөр 24 м өргөнтэй болгож, замын нийт уртад хамгаалалтын төмөр хайс, гэрэлтүүлгийг хийж гүйцэтгэсэн байна.

Хучилтын хувьд цементбетон хучилт 240 мм, цементээр бэхжүүлсэн суурь 150 мм, суурийн доод үе 150 мм аж. Инженерийн байгууламжийн хувьд Зам барилгын ажлын явцад 120 орчим хөндлөн сэтэлгээ хийж, цахилгаан, дулаан, цэвэр, бохир усны шугам сүлжээг огтлолцуулж, инженерийн байгууламжуудтай уялдуулсан байна. Замын нийт уртын дагуу ус зайлуулах 8886 метр шугам хоолой, 281 ширхэг худаг, 640 метр лотки, 237 шон бүхий гэрэлтүүлгийг шинээр суурилуулжээ.