Халтиргаа гулгаа эхэлсэн энэ үед албан байгууллагууд ойр орчмынхоо цас мөсийг цэвэрлэх үүрэгтэй байдаг. Замын хөдөлгөөний аюулгүй байдлын тухай хуулийн 54.16-д “Зам, замын байгууламжийн засвар арчлалтыг стандартын дагуу хийгээгүйгээс замын хөдөлгөөний аюулгүй байдлыг хангахад саад учруулж, зам тээврийн осол, хэрэг гаргах нөхцөлийг бүрдүүлсэн, зам тээврийн осол, хэрэг гарсан тохиолдолд холбогдох албан тушаалтан, аж ахуйн нэгж, байгууллагаар учирсан хохирлыг нөхөн төлүүлж, зөрчлийг арилгуулж, албан тушаалтныг нэг сарын хөдөлмөрийн хөлсний доод хэмжээг гурав дахин нэмэгдүүлсэнтэй тэнцэх хэмжээний төгрөгөөр, хуулийн этгээдийг нэг сарын хөдөлмөрийн хөлсний доод хэмжээг тав дахин нэмэгдүүлсэнтэй тэнцэх хэмжээний төгрөгөөр торгох шийтгэл оногдуулна” гэж заасан байна. Явган зорчигчид халтирч унаж байна гэдэг зам тээврийн осол гэсэн үг гэдгийг Замын цагдаагийн газраас онцоллоо.

Өнөө маргаашдаа ч төв, орон нутгуудаар цаг агаар хүндэрч, цасан шуурга шуурахыг Ус цаг уурын хүрээлэнгээс мэдээлж байна. Тиймээс ялангуяа хөдөө орон нутгийг зорих гэж байгаа иргэд тээврийн хэрэгслийнхээ техникийн бүрэн бүтэн байдлыг сайтар хангаж, өвлийн дугуйгаа сольж, шатахууны нөөц, дулаан хувцсаа сайтар бэлдэж явах, эс бөгөөд хөдөө орон нутгийг зорихгүй байхыг Замын цагдаагийн газраас анхааруулж байна.

Д.Ундрах /24tsag.mn/