Батлан хамгаалахын сайд Ц.Цолмон өнөөдөр Америкийн Нэгдсэн Улсаас Монгол Улсад суугаа Онц бөгөөд Бүрэн Эрхт Элчин Сайд Женифер Зимдал Галтыг Батлан хамгаалах яаманд хүлээн авч уулзлаа. Уулзалтаар сайд Ц.Цолмон батлан хамгаалах салбарт өргөн хүрээний хамтын ажиллагаатай АНУ-ын Элчин сайдтай уулзаж байгаадаа сэтгэл хангалуун байгаагаа илэрхийлэн, хамтын ажиллагааны асуудал болон цаашдын харилцаа, хамтын ажиллагааны төлөв, чиглэлүүдэээр хэлэлцэн, харилцан ярилцаж, санал солилцсон юм.

Газар зүйн болон стратегийн байршил нь Монгол Улсыг хоёр хөрштэйгээ эн тэнцүү харилцахыг шаардахаас гадна АНУ болон бусад гуравдагч хөршүүдтэй харилцааг хөгжүүлэх шаардлагыг бий болгож байгааг сайд Ц.Цолмон онцлоод АНУ-ын зүгээс үзүүлж буй харилцаа, дэмжлэг, тусламж нь Монгол Улсын хувьд бүс нутгийн харилцаанд өргөн хүрээнд оролцох, бусад улс орнуудтай хамтран ажиллах боломж олгож байгааг тэмдэглэн хэлсэн. 

Батлан хамгаалах хамтын ажиллагааны чиглэлээр хоёр тал олон арга хэмжээг зохион байгуулж байгаагийн зэрэгцээ Афганистан Улсад явагдаж буй "Шийдвэртэй дэмжлэг" ажиллагаанд АНУ-ын цэргийн бүрэлдэхүүнтэй хамтран үүрэг гүйцэтгэж байгаа нь хоёр орны цэргийн харилцааны өндөр төвшинг илтгэн харуулж байна гэж Сайд Ц.Цолмон онцлон тэмдэглэсэн.

Хоёр орны батлан хамгаалах салбарын харилцааны хөгжлийн 25 жилийн хугацаанд салбарын харилцаа, хамтын ажиллагаа өндөр төвшинд гарсныг талууд цохон тэмдэглэсэн. Энхийг дэмжих ажиллагааны чадавхыг нэмэгдүүлэх, харилцан айлчлал, солилцоог өргөжүүлэх, энхийг дэмжих ажиллагаанд ашиглах техник хэрэгсэлийн тусламж, худалдан авалтын талаар цаашид хамтын ажиллагааг өргөжүүлэх тухай Элчин сайдын саналыг Сайд Ц.Цолмон дэмжиж байгаагаа илэрхийлсэн.   

Элчин сайд Галт Монгол Улс төвийг сахих бодлоготой орон болох гэж байгаа талаар болон, түүнийг УИХ-аар хэлцэж буй талаар сайд Ц.Цолмонгийн байр суурь, санал бодлыг сонсож, харилцан санал солилцов.

Монгол Улсаас хэрэгжүүлэх гэж буй төвийг сахих бодлогын талаар АНУ анхааралтай харж, судалж байгаа талаар элчин сайд Женифер Галт тэмдэглээд төвийг сахих бодлого нь Монгол Улсын гадаад бодлогод эерэг нөлөө авчирна гэдэгт итгэлтэй байгаагаа илэрхийлэв.  Уулзалтад БХЯ-ны Гадаад хамтын ажиллагааны газрын даргын үүрэг гүйцэтгэгч, бригадын генерал Ч.Сосорбарам, Стратегийн бодлого, төлөвлөлтийн газрын дарга, хурандаа Г.Сайханбаяр нар оролцлоо.

Хоёр орны батлан хамгаалах хамтын ажиллагаа бүх төвшний харилцан айлчлал, зөвлөлдөх уулзалт хийх, цэргийн боловсон хүчний сургалт, энхийг дэмжих ажиллагааны чиглэлээр хамтран ажиллах, хамтарсан хээрийн дадлага зохион байгуулах зэрэг хэлбэрүүдээр улам өргөжиж байна.