Орхон аймагт 2006 оноос барьж эхэлсэн 17 метр өндөр Бурхан багшийн сэрэг дүрийг энэ жил дахин алтдаж эхэлжээ.

467 хэсгээс бүтсэн энэхүү хөшөөт цогцолборыг бүтэн зургаан жил барьсны эцэст 2012 онд дуусгаж, эргэн тойрныг нь тохижуулах л үлдээд байсан юм.

Гэтэл 2013 оноос сэрэг дүрийн гагнаас хөндийрч, дусаал гоожиж эхэлсэн тул тус аймгийн ИТХ-ын шийдвэрээр хоёр гурван жил зассан. Сэрэг дүрийн гаднах хэсгийг алтаар бүрэхээр 348 мянган ширхэг ялтсан алт бэлтгэсэн байсан юм. Гэсэн ч гуулийг (87 тн цэвэр гуулиар сэрэг бүрийг бүтээсэн) алтаар бүрэх боломжгүй гээд нэг бүр нь 447 төгрөг 20 мөнгөний үнэтэй ялтсан хуудсуудыг худалдан, мөнгийг нь засварт зарцуулахаар төлөвлөсөн.

Гэсэн ч энэ нь 2007 оны ханш тул дэлхийн өнөөгийн зах зээлийн ханшаар борлуулна гээд судалгаа хийсэн ч ялтсан алт зардаг газар хаа ч байдаггүйг мэдээд үнийг нь тогтоож чадаагүй, авах хүн ч олдоогүй аж. Тиймээс энэ жил нөгөө алтаараа сэрэг дүрээ бүрэхээр тогтож, 79 сая төгрөг төсөвлөжээ. Энэ ажлыг “Мэдрэхүйн мэлмий” ХХК хийж байна.