Ерөнхийлөгч Ц.Элбэгдоржийг Халх голд очиж, тэнд үүсээд буй  нөхцөл байдалтай танилцана гэх мэдээлэл зарим хэвлэл мэдээллийн хэрэгслээр гарсан. Энэ талаар Ерөнхийлөгчийн Тамгын газраас тодруулахад “Ерөнхийлөгч Халх гол сум руу явахгүй. Ташаа мэдээлэл байна" гэсэн хариултыг өглөө.

Халх гол орчмын 5000 га газрыг чөлөөт бүс болгох тогтоолын төслийг УИХ өнгөрсөн хаврын чуулганаар буюу наадмын өмнөх өдөр баталсан. Уг тогтоолын төсөлтэй холбоотойгоор нийгэм, улс төрийн хүрээнд багагүй маргаан үүсээд байгаа. Тодруулбал, Халх гол сумын иргэд тус газрыг чөлөөт бүс болгон ашиглахыг эсэргүүцэж  шийдвэрээ буцаахыг Засгийн газраас шаардаж байгаа юм. Саяхан ХХАА-н сайд Р.Бурмаа тус суманд очиход сумын иргэд түүнийг Халх гол руу оруулалгүй хөөж, буцаасан байдаг. Хөдөө, аж ахуйн яамны зүгээс тус газрыг гадаад, дотоодын компаниудад түрээслэж эдийн засгийн эргэлтэд оруулснаар улсын төсөвт их хэмжээний хөрөнгийг төвлөрүүлэх боломжтой. Тиймээс газрыг хуулийн дагуу байгаль, орчинд хор, хохирол учруулахгүйгүйгээр ашиглана гэсэн тайлбарыг хийж байгаа юм. Харин тус сумын иргэд болон УИХ-ын зарим гишүүд "5000 га газрыг ямар ч хяналтгүйгээр гадныханд урт хугацаагаар түрээслэх нь аюултай. Мөн тооцоо судалгаагүйгээр чөлөөт бүсийг байгуулж болдоггүй. Тооцоо, судалгаа хэрэгтэй" гэж байгаа юм.

Энэ мэт маргаан нь сүүлдээ иргэдийн эсэргүүцэл, тэмцэлд хүрээд байна.

Үүнтэй холбоотойгоор Монгол Улсын Ерөнхийлөгч Халх гол суманд очиж, нөхцөл байдалтай биеэр танилцана гэсэн мэдээлэл зарим хэвлэлээр цацагдаад байсан юм. Ямартай ч Ерөнхийлөгч Дорнод аймгийн Халх гол суманд очих, нөхцөл байдалтай биеэр танилцах нь ташаа мэдээлэл аж.

"Халх голыг чөлөөт бүс болгох тогтоолын төслийг УИХ-аас баталсан. Тиймээс энэ асуудал Ерөнхийлөгчтэй ямар ч хамааралгүй гэсэн үг. Уг тогтоолын төслийг буцаая гэвэл гишүүд юм уу Засгийн газар ахин хууль санаачилж, УИХ-аар оруулж байж л шийдэх асуудал" гэдгийг албаны хүн хэллээ.

24tsag.mn