Зам тээврийн сайд М.Зоригт долоо хоног бүрийн даваа гарагт шуурхай хурлаа хийж, харьяа газрынхаа дарга нартай уулзаж, үүрэг даалгавар өгдөг болсон билээ. Тэгвэл сайдын шуурхай хуралдаан өчигдөр болж, хэд хэдэн асуудлыг шийдвэрлэсэн юм. Тухайлбал, НАЗГ-ын дарга Д.Нанзаддоржид нийтийн тээврийн автобуснууддаа GPS суулгахыг үүрэг болгов. М.Зоригт сайд “Авто тээврийн үндэсний төв өнөөдрийн байдлаар 640 тээврийн хэрэгсэл, таксины үйлчилгээнд явж байгаа машинуудынхаа 90 гаруй хувьд нь GPS тавиад байна. Харин Нийслэлийн нийтийн тээврийнхэн хот дотор явж байгаа автобуснуудад GPS тавиулахгүй гэсэн байна. Заавал GPS тавих ёстой. Танай галзуу хулгана шиг автобусан дотор жирэмсэн эмэгтэй төрмөөргүй байна шүү" хэмээн хатуухан сануулсан байна.

Мөн Монголд үйл ажиллагаа явуулж байгаа олон улсын тээвэр зуучийн үйл ажиллагаа явуулдаг дотоод, гадаадын аж ахуйн нэгжийн удирддагуудтай яаралтай уулзаж, энэ чиглэлийн компаниудын ажлыг цэгцэнд оруулахгүй бол үйл ажиллагаа нь дампуурлын байдалд байгаа талаар хөнджээ. Үүнээс гадна М.Зоригт сайд авто зам, тээвэр, төмөр зам, агаарын тээврийнхэнд зориулж, аюул осол зөрчлөөс сэргийлэх онцгой албан даалгавар хүргүүлсэн байна.