МАХН-ынхан саяханы нэг өдөр “Өргөө” зочид буудалд өргөтгөсөн бүрэлдэхүүнтэйгээр хуралдсан гэх мэдээлэл байна. Тэд уг уулзалтаараа хэд, хэдэн асуудлыг ярилцаж тохирчээ. Тодруулбал, Өршөөлийн хуулийн зарим асуудал мөн "АСЕМ"-ыг зохион байгуулахаас татгалзах саналыг гаргаж, энэ талаар Ерөнхий сайдад асуулга хүргүүлэх талаар ярилцсан сураг байна. Мөн намынхаа нарийн бичгийн дарга Ц.Шаравдоржийг МХЕГ-ын даргаар томилох асуудлыг хэлэлцэж, үндсэндээ шийдвэрлэжээ. Үүнд намын дарга Н.Энхбаярын дэмжлэг ихээхэн нөлөөлсөн гэнэ. Одоо МХЕГ-ын даргаар МАН-ын гишүүн Б.Раднаабазар ажиллаж байгаа юм. Гэвч МАН-ынхан Засгийн газраас хөөгдөж оронд нь “МАХН-МҮАН”-ын “Шударга ёс” эвслийн бүлэг орсон учраас тус агентлагийн даргыг солих ажиллагаа ийн эхэлсэн байна.

Харин МАХН-ын залуу гишүүд Ц.Шаравдоржийг эсэргүүцэж байгаа аж. Учир нь Ц.Шаравдорж нь улсад хийдгээ хийгээд тэтгэвэрт суух насан дээрээ байгаа. Гэтэл залуусынхаа өмнүүр орж буйд тус намын их л цухалдаж байгаа сурагтай.  Тэд “Туршлага нэрээр хөгшчүүдийг албан тушаалд томилж, бялуу хуваалгах юм. Нөгөөдүүл нь очсон газартаа зоригтой шинэчлэлийг хийж чаддаггүй. Зөв улс төрийн эрх ашгийн үүднээс ажилладаг. Ер нь хөгшчүүд залуустаа зайгаа тавьж өгч сурах хэрэгтэй” гэж ярьж яваа аж.

Мөн  МАХН-ын дарга Н.Энхбаяр ч мөн төрийн албанд орох сураг байна.  

Т.Хулан