Монгол Улсаас БНХАУ-ын Эрээн хотод суух Дэд консул А.Баярсайхан дипломат машинтай Эрээн рүү буу, сум, их хэмжээний галт зэвсэг гаргах гэж  байгаад баригдсан талаарх мэдээлэл хэвлэл мэдээллийн хэрэгслээр цацагдсан. Гэвч энэхүү мэдээллийг баттай эх сурвалж үгүйсгээд байна. 

Тодруулбал, Дэд консул А.Баярсайхан  биш өөр монгол иргэн спортын зориулалттай, үрлэн сумтай хийн буу гаргах гэж байгаад ийн хил дээр саатуулагдсан байжээ.

Өөрөөр хэлбэл, Монголын иргэн С гэгчийн ачаан дотор спорт төрлийн гар буу, үрлэн сумын хамт илэрсэн байна. Энэ нь галт зэсвэгт тооцогдохгүй учир БНХАУ-ын эрүүгийн хуулиар эрүүгийн хэрэг үүсгэх үндэслэлгүй аж. Тиймээс манай улсын иргэн С-ийг БНХАУ-ын Захиргааны хуулиар торгуулын арга хэмжээ авч, хоёр хоног саатуулан гаргасан байна. 

Харин Дэд консул А.Баярсайханы хувьд монгол иргэнийг саатуулагдах үед хилээр гарах гэж явсан нь ийн хардлага сэрдлэг гарахад нөлөөлсөн бололтой. Түүнээс биш хэвлэлээр гарсан шиг галт зэвсэг тээвэрлэж явсан зүйл огт байхгүйг баттай эх сурвалж онцоллоо.

Д.Дуулим