Улсын төсвөөс 100 гаруй тэрбум төгрөг зарцуулан, төсөвлөдөг “оюутны 70 мянга”-ыг ирэх арванхоёрдугаар сард улирлаар нь олгоно гэж Сургалтын төрийн сангаас мэдээллээ.

Энэ жил эдийн засгийн хүнд байдалтай холбоотойгоор Засгийн газрын тогтоол гарч “Дээд боловсролын сургалтын байгууллагад суралцагчид суралцагчийн тэтгэлэг олгох журам”-д өөрчлөлт оруулсан байна. Өөрчлөлтөд сурлагын голч дүнг дараах байдлаар өсгөж оюутны  үндэсний тэтгэлгийг олгохоор болжээ.

ҮНДЭСНИЙ ТЭТГЭЛЭГТ 

-Баклаврын хөтөлбөрт суралцагчийн голч дүн 2.0-оос доошгүй байсныг 3.0-оос доошгүй,

-Магистрын хөтөлбөрт шинээр элсэгчийн баклаврын дипломын голч дүн 2.8-аас доошгүй байсныг 3.2-оос доошгүй,

-Докторын хөтөлбөрт шинээр элсэгчийн магистрын дипломын голч дүн 3.0-оос доошгүй байсныг 3.5-аас доошгүй гэж заасан.

УРАМШУУЛЛЫН ТЭТГЭЛЭГТ

- 50 хувийн урамшууллын тэтгэлэг авах суралцагчийн голч дүн 3.4 болон түүнээс дээш байсныг 3.6 болон түүнээс дээш,

- 75 хувийн урамшууллын тэтгэлэг авах өдрийн ангийн магисрант, доктрантын голч дүн 3.6-аас дээш байсныг 3.8-аас дээш болгон тус тус өндөрсгөсөн байна.