“Эрдэнэс Тавантолгой” ХК-ийн Үйлдвэрчний эвлэлийн дарга С.Эрдэнэ өнөөдөр хэвлэлийн хурал хийх үеэрээ өөрийгөө шатаасан хэрэг гарсан билээ.

Тэгвэл түүний энэхүү үйлдлийг хүмүүс эерэг, сөрөг аль аль  талаас нь харж байгаа юм. Юутай ч биеийн байдал нь сайнгүй эмнэлэгт хэвтэж буй С.Эрдэнэтэй "Эрдэнэс Тавантолгой" компанийн удирдлагууд хийгээд албаныхан, жирийн иргэд ч очиж уулзаж байгаа аж.

"Иргэдийн шударга шүүх" ТББ-ын тэргүүн Х.Бат-Ялалт "Дөнгөж сая С.Эрдэнээ ахтай уулзаад ирлээ. Биеийн байдал нь хүндхэн байгааг эмч нар нь хэлж байна. Монголчууд бидний хөдөлмөрлөх эрх баталгаатай байх нь Монгол улсын Үндэсний Аюулгүй байдал юм шүү гэдгийг дахин дахин хэлж байна.

Хэдийгээр хохирогчоор мэдүүлэг авах цагдаагийн албан хаагчтай таарсан ч гэрт нь нэгжлэг хийсэн тухай ярихыг сонсоход ХАЧИРХАЛТАЙ!

Энэ эрхэм ахыг мэддэг болоод багагүй хугацаа өнгөрч: Эв санааны нэгдэл гэдэг Үйлдвэрчний эвлэлийн байгууллага байгуулаад хэдэн ажилчдынхаа эрх ашгийг хамгаална гээд тэмцэж байхтай олон таарч байсан юм байна.

Хийсэн үйлдлийг нь зөвтгөж буруутгах эрх надад алга. Ямар ч байсан аргаа бараад ийм шийдвэр гаргаж дээ л гэж бодож байна.

Үнэндээ бид асуудалд бодитоор хандах зайлшгүй шаардлага байгааг бидэнд хатуу санууллаа. Бидэнд эв нэгдэл хэрэгтэй байна. Бидэнд нэг нэгнээ хайрлаж, хүндэтгэх ёс зүй үгүйлэгдэж байна.

Ямар ч байсан ИШШ ТББ-ын зүгээс С.Эрдэнээ ахын хийсэн үйлдэлтэй холбоотой асуудлыг нарийвчлан судалж бодит үнэнийг тогтооход шаардлагатай бүхий л арга хэмжээг авахаа мэдэгдэж байна.

Та бүхнийг энэ асуудалд хөнгөн хийсвэр хандаж элдэв гүжирдлэг, гүтгэлэг тарааж хэн нэгнийхээ зовлон бэрхшээлээр тохуурхан даажигнахгүй байхыг хичээнгүйлэн хүсье!" гэж фэйсбүүк хуудсаараа санал сэтгэгдлээ илэрхийлжээ.