С.Зориг агсны эхнэр Д.Булганыг ЦЕГ-аас түр саатуулаад байгаа юм. Энэ талаарх мэдээллийг өчигдөр ЦЕГ-аас сэтгүүлчдэд өгсөн бөгөөд "Д.Булганыг саатуулсан нь үнэн. Харин хэрэг мөрдөн байцаалтын шатандаа явж буй учир ямар нэгэн мэдээлэл өгөхгүй боломжгүй" гэсэн юм.

Одоогоор Д.Булганыг ямар хэргээр саатуулсан нь тодорхой бус байна. Гэхдээ албаны эх сурвалжийн мэдээлж буйгаар хэргийн мөрдөн байцаалтыг өчигдрөөс эхлүүлсэн гэнэ. Уг нь түүнийг өнгөрсөн амралтын өдөр саатуулсан юм. Мөн Д.Булгантай хамт хоёр иргэнийг саатуусан гэх мэдээлэл ч байна.

Ямартаа ч С.Зориг агсны эхнэр Д.Булганыг өнгөрсөн бямба гарагийн шөнө гэрээс нь баривчилж, ШШГЕГ-ын харьяа цагдан хорих 461 дүгээр ангид саатуулжээ. 

Хууль зүйн сайд Д.Дорлигжав: Улсын Ерөнхий прокурор болсныхоо дараа энэ хэрэгт онцгой анхаарал хандуулж эхэлснээ мэдэгдэж байлаа.

УИХ-ын гишүүн Д.Дэмбэрэл: Олон улсын парламентын холбооны 120 дугаар хуралд оролцохдоо С.Зориг агсны хэргийн талаар дахин танилцуулж, Германд нарийн шинжилгээнд хамруулахаар болсон гэдэг. 

10 дугаар сарын 2 ба 4 дүгээр сарын 20-нд хэвлэлийнхэн С.Оюун гишүүнээс алуурчныг олох боломжтой үгүйг ёс юм шиг асуудаг ч тэрээр “Хэрэгтнийг олно гэдэгт итгэдэг” хэмээн хариулдаг. Одоогоор ямар нэгэн тайлбар хийгээгүй байна.

Харин Д.Булганыг саатуулж С.Зориг агсны хэрэг яригдаад эхлэхэд УИХ-ын гишүүн С.Одонтуяа “Энэ талаар мэдээлэл ирээгүй байна" гэлээ.

Тэгвэл УИХ-ын гишүүн О.Баасанхүү твиттер хуудсандаа  "С.Зоригийн хэрэг тун удахгүй илэрнэ гэж итгэж байна" гэсэн юм.

Юутай ч энэ хэргийн талаар ам нээх гишүүд хараахан байхгүй байгаа юм.  Тэгэхээр Д.Булганыг шалгаж байгаа явдал маш нууцлагдмал байгаа гэхэд болно. Хаа хаанаа нууцалсан, түгшүүр дагуулж буй энэ хэрэг хэрхэн өрнөж, төгсөхийг таашгүй юм.

Гэтэл хамт шалгагдаж байгаа 40 орчим насны хоёр иргэний хувьд хэргээ хүлээсэн гэх мэдээллийг эх сурвалж хэлээд байна. 

Харин Д.Булган худал мэдүүлэг өгсөн, хуулийн байгууллагынхныг төөрөгдүүлсэн байж болзошгүй байгаа аж.

Энэ мэтээр С.Зориг агсны хэрэг хэзээ нэгэн цагт дахин шуугиан дэгдээх нь тодорхой байсан ч бас л нууцлагдмал, бүрхэг байсаар байгаа юм.

Д.Дуулим