ХУД-ийн XV хорооны нутаг дэвсгэрт баригдаж буй 600 автомашины нийтийн зогсоолын барилгад энэ сарын 17-ны 04:00 цагийн орчимд осол болсны улмаас 54 настай, эрэгтэй М амиа алдсан тухай манай сайт өмнө нь мэдээлсэн билээ.

Барилгын дотор хогийг цэвэрлэж байхад өргөгч кранд бэхэлсэн хогтой төмөр савны оосор тасарч иргэн М-ийг цохиж гурван давхраас унагаасан байна. Албаныхны ярьснааг уг осол хөдөлмөрийн аюулгүй байдлын дүрэм журмыг ноцтой зөрчсөний улмаас болсон аж.

Уг барилгыг “Хурд” групп ахлан барьж байгаа бөгөөд туслан гүйцэтгэгчид нь “Хос бар”, “Дабл гранд” барилгын компани аж. Төв цэнгэлдэх хүрээлэнгийн баруун хойно баригдаж буй авто зогсоол 2016 оны есдүгээр сард ашиглалтад орохоор төлөвлөгдсөн байжээ.

Хохирогч М-ийн төрсөн ах :Асуудал шүүх, цагдаа дээр явагдаж байгаа
“Осол болоход би хөдөө байлаа. Хэнтийгээс ирлээ. Дотор цэвэрлээ хийж байгаад кранаар хогоо гаргасан юм билээ. Тэгэхэд л осол болсон бололтой. Асуудал шүүх, цагдаа дээр явагдаж байгаа болохоор одоо дүгнэлтийг хэлж мэдэхгүй юм”

Нийслэлийн мэргэжлийн хяналтын газрын Барилгын техник, өргөх механизмын Улсын байцаагч Л.Алтангадас: Ачаа өргөх краны төхөөрөмжийн аюулгүй ажиллагааны дүрэм журмыг зөрчсөн

3 давхраас унасан байдалтай нас барсан байна. Цэвэрлэгээний ажил хийж байхдаа дотор байсан хогийг тэвш дээр хийж татаж байгаад кранаар татах үед оосорлож байсан хүн нь унасан бололтой. Ачаа өргөх краны төхөөрөмжийн аюулгүй ажиллагааны дүрэм журмыг зөрчсөн. Уг нь тусгай зориулалтын шат тавцан байрлуулж, тэндээсээ кранаар буулгах ёстой л доо. Гэтэл барилга дотроосоо ачаагаа шууд татааж гаргасны улмаас ийм осол болсон байна”

ЦЕГ-ын Хэвлэл мэдээллийн төвийн ахлах байцаагч, цагдаагийн ахмад Ё.Лхагвасүрэн:
“2015 оны арваннэгдүгээр сарын 17-нд ХУД-т барилга дээрээс хүн унаж нас барлаа гэсэн мэдээлэл цагдаагийн байгууллагад өгсөн. Мэдээллийн дагуу очиж цагдаагийн байгууллага үзлэг, шалгалт хийлээ. Гэмт хэргийн улмаас Налайх дүүргийн II хороонд оршин суудаг 53 настай, эрэгтэй М гэгч барилгын цэвэрлээний ажил хийж байгаад хөдөлмөрийн аюулгүй ажиллагааны журам зөрчсөний улмаас унаж амь насаа алдсан хэрэг дээр ХУД дэх Цагдаагийн I хэлтэс эрүүгийн хэрэг үүсгэн шалгалтын ажиллагаа хийгдээд явж байна” хэмээсэн юм.

Харин уг асуудлаар “Хурд” групптэй холбогдоход “Энэ талаар мэдээлэл өгөх боломжгүй. Манай хөдөлмөр, аюулгүй байдлын инженерээс асуу” хэмээх тайлбарыг www.today.mn сайтад өгчээ.

Дашрамд дуулгахад, өчигдрийн осол нь “Хурд” группийн барилгаас ослын улмаас амиа алдсан дөрөв дэх тохиолдол болж байна.

2012 оны есдүгээр сард тус группийн “Рапид харш” хорооллын барилгын арваннэгдүгээр давхарт ажиллаж байсан краны цамхаг нурснаар уг краныг жолоодож байсан 26 настай залуу хорвоог орхив.

2013 оны дөрөвдүгээр сарын сүүлчээр “Хурд” группийн “Нарны хороолол”-ын барилгын талбайд дамнуургаар цемент зөөж явсан 40 настай эрийн дээрээс 20 кг жинтэй төмөр унасны улмаас амиа алдаж байлаа. Тухайн үед барилгын есөн давхарт кранаар сапуд төмөр өргөж байсан бөгөөд кранчин өргөж явсан ачаанаасаа доошоо унагачихсан байдаг.

2014 оны дөрөвдүгээр сард ХУД дэх “Хурд” группийн “Хүннү-2222” хорооллын барилгаас 25 настай, эрэгтэй Т унаж, нас барсан юм. Ослын шалтгаан нь хамгаалалтын бүс нь найдваргүй ажиллагаатай байсны улмаас барилгачин унаж амиа алдсан гэж дүгнэж байлаа.

Ийнхүү “Хурд” групп хөдөлмөрийн аюулгүй ажиллагааны дүрэм журмаа удаа дараа зөрчиж, алдаагаа ухамсарлаагүйн улмаас сүүлийн 4 жилд, 4 барилгын ослоор 4 хүн амиа алдсан ноцтой тохиолдлууд гарч байна.

“Хурд” группийг үүсгэн байгуулагч, хувьцаа эзэмшигч нь УИХ-ын гишүүн Б.Чойжилсүрэн юм. Тэрбээр Хөрөнгө орлогын мэдүүлэгтээ “нэг орон сууцтай. Жилд 28 сая төгрөг олдог бөгөөд дансандаа 15 сая төгрөгтэй. Тэднийх найман адуунаас өөр малгүй. Гэр бүлийнх нь гишүүн 15 сая төгрөг олдог. Группээсээ нэг тэрбум төгрөгийн хувьцаа эзэмшдэг” гэжээ.

Д.Ундрах /24tsag.mn/