Монголын зорчигчид галт тэргээр Парис руу аялах боломжтой боллоо. Олон улсын төмөр замчдын холбоо, НҮБ–ын Байгаль орчны газраас хамтран зохион байгуулж байгаа үйл ажиллагааны хүрээнд  Бээжин- Улаанбаатар-Москва хотуудаар дамжаад Парист очих галт тэрэгний аялалыг анх удаагаа нэвтрүүллээ. Ази, Европыг холбосон тээврийн асуудал, байгаль орчинд үзүүлж буй сөрөг нөлөөллүүдийг багасгах зорилготой анх удаагийн аялалд Монгол улсыг төлөөлж “Улаанбаатар Төмөр Зам” хувь нийлүүлсэн нийгэмлэгийн үйлчилгээний хоёр ажилтан оролцохоор болж өнөөдөр төв вокзалаас хөдөллөө. Тэдний холын аялалд амжилт хүсэн, үдэн гаргах ёслолд тус байгууллагын орлогч дарга Л.Даваапил оролцлоо. Тэд энэ сарын 28 –нд Францын нийслэл Парис хотноо болох дэлхийн төмөр замын байгууллагуудын дээд удирдлагын уулзалтад хүндэтгэл үзүүлэх юм. Энэ аялалд Орос, Монгол, Хятадын төмөр замын байгууллагуудын төлөөллүүд оролцож байгаа аж. “Энэ нь цаашдаа далайд гарцгүй манай орны хувьд төмөр замд холбогдсон бүхий л газраар дамжин ачаа, хүн тээврийн үйлчилгээнд хамрагдах боломжийг бүрдүүлснээрээ онцлог. Торгоны зам, Талын зам, Цайны зам Евро, Азийн бүс нутгийн хөгжлийн асуудалд жинтэй хувь нэмэр оруулж төмөр зам, далайн тээвэртэй өрсөлдөх боломжтой гэдгийг “Улаанбаатар төмөр зам” хувь нийлүүлсэн нийгэмлэгийн дэд дарга Л.Даваапил онцлон хэллээ. Ийнхүү монголчууд төмөр зам холбогдсон бүхий л газруудад зорчих, аялах боломжтой гэдгийг энэ удаагийн аялалын маршрутаас харж болохоор байгаа юм.

Анх удаагийн туршилтаар явж буй уг галт тэргээр аялагчид 9 хоногийн турш төмөр замаар аялж Парис хотод очих аж. Одоогийн байдлаар Улаанбаатар Төмөр зам билетийн касс Парис явах галт тэрэгний тасалбарын тооцоо суугаагүй аж. Харин Улаанбаатараас Москва хүртэл 365 мянган төгрөгөөр зорчдог. Түүнээс цааших чиглэлийг Оросын тал хариуцна хэмээн “Улаанбаатар Төмөр зам” хувь нийлүүлсэн нийгэмлэгийн олон улсын галт тэрэгний тасалбар түгээгчид ярьж байна.