Байгаль хамгаалагч залуу учир битүүлэгээр амиа алдсан хэрэг олны анхааралд байгаа. Тэгвэл тус хэргийн талаар байгаль хамгаалагчид болоод УИХ-ын гишүүд ч анхаарал хандуулж эхэлжээ.
Тодруулбал талийгаач залуугийн амиа алдсан хэрэгт "Гацуурт"-ын Л.Чинбат анхаарлаа хандуулж, өөрийнхөө фэйсбүүк хуудаснаа "Талийгаач залуугийн амиа алдсан талаарх мэдээллийг өөрийн зүгээс 10 сая төгрөгөөр худалдан авна" хэмээн бичжээ.
Хэргийн талаар эргэн сануулбал, талийгаач залуу нийслэл дэх гэрээсээ "Машинаа гаражид хийгээд ирье" хэмээн гараад зургаан хоногийн дараа Хөвсгөлөөс амиа алдсан байдалтайгаар олдсон юм. Энэ нь гадны нөлөөтэй хэмээн ар гэрийнхэн нь үзэж, цагдаагийн байгууллагаас гомдол гаргаад байгаа билээ. Гомдлын дагуу УМБГ-аас ажлын хэсэг байгуулагдан байгаль хамгаалагч залуугийн амиа алдсан шалтгааныг тодруулахаар ажиллаж байна.
Талийгаачийг гадны нөлөөтэй амиа алдсан гэж үзэх хэд хэдэн шалтгаан байгааг түүний аав олон нийтэд мэдээлээд байгаа. Тухайлбал, талийгаач өмнө нь гурван удаа хутгалуулж байсан аж. Талийгаачийн бусдад хутгалуулсан хэргийг цагдаагийн байгууллагаас шалгаж дуусаагүй байхад амиа алдсан байдаг. Мөн дарамт шахалтад байсан учраас талийгаач залуу цагдаагийн байгууллагаас хамгаалалт хүссэн ч СХД-ийн цагдаагийн хэлтсээс гэмт хэргийн бүрэлдэхүүнгүй хэмээн гомдлыг хэрэгсэхгүй болгож байжээ.
Юутай ч уг хэргийг улстөржүүлэхгүй цагдаагийн байгууллага үнэн зөвийг нь олж, гэмт этгээдийг илрүүлэх байх гэдгээ ар гэрийнхэн нь илэрхийлээд байгаа юм.
Сэтгэгдэл (4)