ОУХМ Э.Бэхбаяр түүний багш МУГТ А.Энхээ, Л.Болормаа нар өнөөдөр мэдээлэл хийв.

Учир нь Э.Бэхбаяр хэдхэн хоногийн өмнө Бакуд болсон Алтан Гранпри тэмцээнээс мөнгөн медаль хүртэж 5000 ам.доллараар шагнуулсан билээ. Гэтэл ‪шагналын ‪мөнгө нь хулгайд алдагдсан байна.

Тэд энэ талаар ярихдаа Э.Бэхбаяр Бакугаас буцахдаа мөнгөө тоолоод тоо ёсоор нь багшдаа хадгалуулсан. Ингээд Бээжинд ирээд хоол идэхээр бөөндөө суутал багш нь "Та нар надаар тоглоод байна уу" гэж уурлан мөнгийг нь гаргаад ширээн дээр шидтэл нөгөө шагналын мөнгө нь хоёр захдаа 100 долларын дэвсгэртээр халхалсан нэг долларын дэвсгэртүүдээр солигдсон байсан аж. Тиймээс Э.Бэхбаяр багш нарынхаа хамтаар цагдаагийн байгууллагад хандсан байна. Уг хэргийг цагдаагийн байгууллага шалгаж байгаа юм байна.

Түүнчлэн Э.Бэхбаярын багш А.Энхээгийн эхнэр олон улсын шүүгч Л.Болормаа хэлэхдээ “Бэхээ маань шагналаа аваад тэмцээнд хамт оролцсон З.Дүвчин, Ц.Цогтбаяр багш, С.Батцэцэг, С.Цэрэнчимэд, Б.Одончимэг, Цэвэгмид, Г.Мандахнаран нарт тус бүрт нь 100 ам.доллар өгсөн юм билээ. Өөрөө 100 ам доллар хэрэглэсэн. Ингээд үлдсэн 4200 ам.доллараа алдлаа. Хамгийн гол нь хууль, цагдаагийнхан энэ хэргийн учрыг үнэнээр нь олж өгөөсэй гэж хүсэх байна. Бид хэнийг ч энэ хэрэгт сэжиглээгүй байна. Мөн хэнийг ч гүтгээгүй. Манай чөлөөт бөхийн хамт олон дотор ийм муухай зүйлс гарч байна гэж бодохоор гомдмоор байна. Чөлөөт бөхийн тамирчид бүгд нэр төртэй, улс орныхоо нүүр царай болсон хүмүүс шүү дээ” хэмээв.