Сүүлийн үед гаалийн байцаагч нарыг авлигын хэргээр шалгаж, цагдан хорьсон гэх мэдээлэл гарах болсон. Тэгвэл энэ хэргийн талаар АТГ албан ёсоор тайлбар өглөө.

АТГ-аас "Авлигатай тэмцэх газрын Мөрдөн шалгах хэлтсээс Гаалийн ерөнхий газрын Төрийн захиргаа, хамтын ажиллагааны газрын даргаар ажиллаж байсан Б.Оюундэлгэр, тус газрын ахлах мэргэжилтнээр ажиллаж байсан Ж.Баттогтох, Гаалийн ерөнхий газрын Замын-Үүд дэх гаалийн газрын гаалийн улсын ахлах байцаагч Ч.Насанбат, гаалийн улсын байцаагч М.Дөлгөөн нарын хүмүүсийг бусдаас хээл хахууль авсан хэрэгт холбогдуулан шалгаж байгаа гэдгийг онцлов.

Дээрх хүмүүст Эрүүгийн хуулийн 268 дугаар зүйлийн 268.1, 268 дугаар зүйлийн 268.2, 269 дүгээр зүйлийн 269.1, 270 дугаар зүйлийн 270.2-т зааснаар эрүүгийн хэрэг үүсгэн, мөрдөн байцаалтын ажиллагаа явуулж байгаа аж. Түүнчлэн эрүүгийн хэрэгт холбогдон шалгагдаж байгаа нэр бүхий хүмүүст батлан даалтад өгөх таслан сэргийлэх арга хэмжээ авчээ. Мөрдөн байцаалтын ажиллагаа үргэлжилж байгаа тул хэргийн талаар илүү дэлгэрэнгүй мэдээлэх боломжгүй юм байна.