Монголын жижиг дунд дэлгүүрүүдийг дэмжигчдийн холбоо (МЖДДДХ) “Жижиглэн худалдаа эрхлэгчдийн зөвлөгөөн”-ийг анх удаа зохион байгуулах гэж байна.

Тус холбоо жижиг, дунд дэлгүүрүүдэд орчин үеийн үйлчилгээний дэвшилтэт арга хэлбэр нэвтрүүлэх, үр ашгийг нэмэгдүүлэх, бизнесээ өргөжүүлэхэд нь сургалт, арга зүйн туслалцаа үзүүлэх, чадавхижуулах, төр-хувийн хэвшлийн үйл ажиллагааг уялдуулах зорилготой ажилладаг аж.

Зөвлөгөөнөөр жижиглэн худалдааны салбарыг хөгжүүлэх, үндэсний үйлдвэрлэлийг дэмжих, сүлжээ дэлгүүрийн тогтолцоог бүрдүүлэхэд үйлдвэрлэгч, нийлүүлэгчийн оролцоог нэмэгдүүлж, төр, хувийн хэвшлийн хамтын ажиллагааг бэхжүүлэх талаар хэлэлцэх юм байна.

Мөн зөвлөгөөнөөр үйлдвэрлэгч, түгээлт, нийлүүлэлтийн сүлжээнд оролцогчид, сүлжээ дэлгүүрийн хамтын ажиллагааны зөвлөмж бичиг, төр хувийн хэвшлийн хамтын ажиллагааны санамж бичиг байгуулах юм. Энэ сарын 7-нд Төрийн ордонд болох зөвлөгөөнийг Аж үйлдвэрийн яам, МУИС–ийн Бизнесийн Сургуулийн Худалдааны тэнхим хамтран зохион байгуулах аж.

Тэд жижиглэн худалдаанд инноваци, ухаалаг техник технологийн дэвшлийг нэвтрүүлэх, ая тухтай дэлгүүрийн стандартыг хэрэгжүүлэх, үйлдвэрлэгч, нийлүүлэгч, худалдаа эрхлэгчдийн харилцан ашигтай хамтын ажиллагааг эхлүүлэх нь зөвлөгөөний гол үр дүн байх болно гэж төлөвлөжээ.