Замын-Үүд дахь Гаалийн газрын экс дарга Б.Хишигбат хэвлэлийнхэнд хандав. Түүнийг ГЕГ-ын дарга О.Ганбат хууль бусаар албан тушаалаас нь чөлөөлж, өөр албанд томилсон юм байна. Түүнээс гадна түүний оронд томилогдож очсон дарга Цогтбаатар ажлаа хийж чадахгүйгээс болж өнөөдөр зургаан байцаагч эрүүгийн хэрэгт татагдсан гэдгийг илэрхийлэв. 

Түүнийг тушаал биелүүлээгүй, эсэргүүцсэн гэдэг шалтгаанаар хоёр удаа хууль бусаар шийтгэсэн байна. Тодруулбал,  “Тушаал эсэргүүцлээ” гээд цалингийн 20 хувиар гурван сар шийтгэчихсэн бол дараа нь  албан тушаалаас бууруулсан байна.

Тиймээс тэрбээр Сангийн сайд Б.Болор, ТӨЗ-д хандсан аж. Улмаар сангийн сайд нь хууль бус тушаалаа хүчингүй болго гэсэн албан тоотыг өгсөн ч О.Ганбат хэрэгжүүлэхгүй байгаа аж. Мөн  Б.Хишигбат цалингийн 20 хувиар гурван сар шийтгэхээр нь Төрийн албаны зөвлөлд хууль бусаар шийтгэл авчихлаа гэж хандсан байна. Гэтэл түүний гомдлыг шалгаж үзээд хууль бус шийдвэр гаргасан О.Ганбатад сахилгын арга хэмжээгээ хэрэгсэхгүй болго гэсэн бичиг явуулжээ. Гэтэл тэрбээр бас л хэрэгжүүлээгүй байна.

Өдгөө хууль бусаар ажлаас халагдсан гэх Б.Хишигбат ГЕГ-ын дарга О.Ганбатыг шүүхэд өгөхөөр болоод байгаа аж.

Цаашлаад хууль хяналтын байгууллагад шалгагдаж байгаа Замын-Үүдийн Гаалийн улсын ахлах байцаагч Ч.Насанбатын хувьд өмнө нь бараа таваарыг хилээр гаргах оролдлого хийж байжээ. Түүний хувьд Насанбатыг тавилга оруулж ирдэг нөхдүүдтэй холбоо сүлбээтэй гэж хардаж байгаагаа хэвлэлийнхнээс нуугаагүй юм.

Юутай ч Ч.Насанбаттай  Зөрчлийн албаны байцаагч Галбадрах, Хяналт шалгалтын байцаагч Дөлгөөн, Үнэлгээний байцаагч Насанжаргал, Гаалийн хэрэг бүрдүүлэлтийн байцаагч Эрдэнэбаатар, Ганзориг нарыг хамтатган шалгаж байгаа аж.

24tsag.mn