Монгол Улсаас БНХАУ-ын Эрээн  хотод суугаа ЭСЯ-ны консулууд янз бүрийн хэл аманд өртөж, хууль бус үйл ажиллагаа явуулж зугтдаг асуудал  бичигдээгүй хууль аятай тогтжээ.

Тодруулбал, консулын газрын ажилтнууд Монгол улсад нэвтрэх визийг дамлан худалддаг тухай яриа байдаг. Гэтэл энэ хэргийн гардан гүйцэтгэгч, зохион байгуулагчаар УИХ-ын гишүүн асан А.Мурат ажилладаг байсан мэдээллийг иргэд хууль хяналтын байгууллагад мэдээллээд байгаа. Гэвч Т.Мурат Казакстан руу зугтсан байдаг. Түүний хувьд хууль хяналтын байгууллагад шалгуулж байгаагаа мэдмэгцээ Казакстанд эмчлүүлж байгаа, сар гаруйн дараа ирнэ гэх албан бичгийг өгч байсан ч өдийг хүртэл сураггүй байгаа юм.

Мөн Эрээн хотод суугаа дэд консул А.Баярсайхан зэвсэг хилээр гарсан гэх асуудалд хутгалдаж албан тушаалаасаа буусан гэх мэдээлэл ч бий. Тодруулбал, ГХЯ-наас "Өөрийнх нь тайлбарлаж буйгаар найзынх нь гэж буй 200 орчим сумтай спорт загварын буу тээвэрлэж яваад Хятадын талд баригдсан мэдээлэл ирсэн. Хэдийгээр найзынх нь цүнхнээс гарсан буу сум гэж тайлбарласан ч дипломат албанд ажиллаж байгаа хүн ажилдаа хайнга хандсан гэх үндэслэлээр ажлаас нь чөлөөлсөн. Хилийн чандад Дипломат төлөөлөгчийн газарт ажиллагсад, ялангуяа Консулын газарт ажилладаг хүн улсын нэр хүндэд харшлахуйц үйлдэл гаргаж, тэр нь тухайн улсын хууль хяналтын байгууллагаар тогтоогдсон бол ажлаас нь чөлөөлдөг.  Энэ дагуу арга хэмжээ авч ажиллаж байна" гэсэн юм.

Консулын нэр бүхий ажилтны зүгээс маш их хууль бус зүйл болж байгаа, бүгдийг нь удахгүй хэвлэл мэдээллийн хэрэгслээр илчилнэ

Тэгвэл энэ бүх асуудлыг хүрээнд манай сурвалжлах баг Эрээн хотод байрлах Монголын консулын газрыг зорьсон юм.

Биднийг очиход иргэд хүлээн авах цаг нь дууссан байсан хэдий ч холбогдох албан тушаалтнууд нь консулын газраа байрлаж байсан юм. Харамсалтай нь хэвлэл мэдээллийн хэрэгсэлд мэдээлэл өгөх "зоригтой" алба хаагчид байхгүй байсныг хэлэх нь зүйтэй биз. Харин хууль бус халаа сэлгээнээс эхлээд олон асуудал эл консулын газар ундарч байгааг  нэр бүхий ажилтнуудын зүгээс албан ёсны мэдээлэл маягаар хэлэхгүй ч цухас дурдаж байсан юм.

Манай сурвалжлах багийг Эрээн дахь Монголын консулын газар очиход албан тушаалаасаа буусан гэх А.Баярсайхан өрөөндөө сууж байсан ч мэдээлэл өгөхгүй, энэ албан тушаалаас буусан учир хэлэх зүйл байхгүй хэмээн хаалгаа нээсэнгүй. Харин ажилтнуудынх нь зүгээс албан тушаалаас чөлөөлөгдөх тушаал нь гарсан үгүйг ч мэдэхгүй, ямар учраас ажлын байрандаа байсаар байгааг ч ойлгохгүй байдалтай байгаагаа хэлж байлаа.

Консулын нэр бүхий ажилтны зүгээс маш их хууль бус зүйл болж байгаа, бүгдийг нь удахгүй хэвлэл мэдээллийн хэрэгслээр илчилнэ гэдгийг бидэнд онцолж байв.

Харин А.Муратын хувь одоо хүртэл сураггүй байгаа аж. Консулын газрын ажилчид нь түүний талаар огт мэдээлэлгүй байсан юм.

Ийн манай сайт зорьсон газраа очиж холбогдох хүмүүстэй уулзаж тодорхой мэдээллийг авсан ч хэсэгхэн хугацаанд дэлгэрэнгүй мэдээллийг гаргахгүй байхыг хүссэн ажилчдын саналыг хүлээж авахаас өөр аргагүй байлаа. 

Харин дараагийн удаад хуучин консулуудын хуудуйтай үйлдлүүд хийгээд ГХЯ-ны холбогдох албаны хүний хамаатан садан, найз нөхөд нь шургалаад буй төрийн албаны үйл ажиллагаа зэргийг бид мэдээлэх болно.

Д.Дуулим