"Улаанбаатар таймс" сонины хэвлэх үйлдвэрийн барилгыг өнгөрсөн долоо хоногт Араб гаралтай Монголын иргэн Абдул Карим 24 тэрбум төгрөгөөр худалдаж авч олны анхаарлыг татсан. Тэрбээр, уг объект дээр шилэн цамхаг босгоно гэж мэдэгдээд байсан ч өнгөрсөн баасан гарагт шийдвэрээсээ буцсан юм.

Тодруулбал, Абдул Карим "Миний болон гэр бүлийн минь талаар ор үндэсгүй, худал мэдээллийг хэвлэлээр цацаж байгаад гүнээ харамсаж байна. 2015 оны арваннэгдүгээр сарын 30-нд болсон дуудлага худалдаагаар Улаанбаатар таймс сонины хэвлэх үйлдвэрийн барилгыг 24 тэрбум төгрөгөөр гадаадын хөрөнгө оруулалттайгаар худалдаж авах байсан боловч тодорхой хүндэтгэн үзэх шалтгаан, Монголынхоо ард түмний санал хүсэлтийг хүндэтгэж энэхүүг гэрээг цуцлах болно" гэж мэдэгдлээ.

Ингэснээр тус хэвлэх үйлдвэрийн барилга дуудлага худалдааны дүрэм ёсоор дараагийн хүнд шилжихээр болж байгаа юм. Хоёр дахь үнийн саналыг "Таванбогд" группын захирал Ц.Баатарсайхан хэлсэн гэдгийг эх сурвалж мэдээллээд байна.

Тиймээс Абдул Карим худалдан авахаас албан ёсоор татгалзвал дээрх объектыг Ц.Баатарсайханд хувьчилж авна гэсэн үг. Гэхдээ Абдул Карим нь одоогийн байдлаар ямар нэгэн гэрээ хэлцэл байгуулж, төлбөрөө төлөөгүй байгаа учир Өмчийн харилцааны газар асуудлыг түр харж байгаа сурагтай.

5 богд групын ерөнхийлөгч, Говь хувьцаат компанийн захирал Ц.Баатарсайханын хувьд Монголын толгой баячуудын тоонд ордог билээ.

2013 онд Монголын баячуудын хөрөнгийн жагсаалыг гаргахад түүнийг  800 сая ам доллартай гэж онцолж байсан юм.

Д.Дуулим