Дундговь аймгийн “Оюуны хөгжил” хувийн цэцэрлэгийн тогооч эмэгтэй 10 сартай хүүхдийг зодож буй бичлэг олныг цочирдуулсан.

Тэгвэл хүүгийн аав Э.Бат-Очир тогооч эмэгтэй бичлэг хийсэн багшийг дарамталсан талаар мэдэгджээ.

Тэрбээр "Анх тэр бичлэгийг багш нь бичсэнийг мэдээгүй. Тэгээд бид аравдугаар сарын 19-ний өдрийн цэцэрлэгийн бичлэгийг шүүлгэхэд тийм бичлэг байгаагүй. Харин бичлэгийг ангийнх нь багш гар утсаараа хийсэн юм билээ. Багш нь тэр тогоочийг урьд нь хүүхэд зоддог гэдгийг мэдэж байсан гэсэн. Тэгээд баталгаажуулах байдлаар хийсэн юм шиг байна. Хамгийн гол нь тэр тогооч хүүхнээс айсан юм шиг байгаа юм. Тэр тогооч эмэгтэй захирлынх нь дүү гэдэг утгаараа их эрх мэдэлтэй, бусдаар юм хэлүүлдэггүй ааштай гэсэн. Бичлэг хийсэн багшийн хувьд залуу хүн. Ажлаас халагдахаас айсандаа тухайн үед болиулж чадаагүй юм шиг байсан. Өмнө нь ийм үйлдлүүд гаргаад байхаар нь багш нь тогоочид хэлсэн байгаа юм. Гэтэл  "Чамд хамаагүй. Ажлаас чинь халуулчихаж чадна шүү. Ажилтай байх эсэхийг чинь би шийднэ” гэх зэргээр дарамталдаг байсан" хэмээжээ.

Ямартай 10 сартай бяцхан хүүг зодсон тогоочид эрүүгийн хэрэг үүсгэн цагдаагийн байгууллага шалгаж байгаа юм. Харин хэрэг болсон цэцэрлэгийн үйл ажиллагааг түр хаагаад байгаа билээ.