"Улаанбаатар таймс” сонины хэвлэх үйлдвэрийн барилгыг нээлттэй дуудлага худалдаагаар Абдул Карим гэх хүн 24 тэрбум төгрөгөөр худалдан авахаар болсон ч тэрбээр гэрээгээ цуцлах өргөдлийг өнөө өглөө өгсөн байна.

Абдул Карим нь өргөдөлдөө "Миний гэр бүлийн талаар нийгэмд таагүй мэдээлэл ихээр цацагдаж байна. Би сэтгэл санааны гүн дарамтад орлоо. Тиймээс эхнэр, хүүтэйгээ зөвлөлдөж байгаад татгалзах шийдвэр гаргалаа. Хэдий дуудлага худалдааны ялагч болсон ч татгалзах нь зөв шийдвэр" гэж бичсэн байна.

Абдул Карим нь тус барилгаас татгалзсан болохоор одоо хэн гэдэг хүн тус обьектыг эзэмших эсэх талаар Нийслэлийн өмчийн харилцааны газраас албан ёсны мэдээллийг өгсөн байна.  Тэдний хэлж буйгаар тус барилгыг "Таван богд" группийн захирал Ц.Баатарсайхан авах боломжтой аж. Нийслэлийн өмчийн харилцааны газраас түүнд  саналаа хүргүүлэх юм байна. Хэрвээ тэр зөвшөөрөхгүй бол дараагийн дуудлага худалдааг зарлах аж. Ц.Баатарсайхан нь  23 тэрбум 850 сая төгрөгөөр худалдаж авна гэсэн саналыг анхны дуудлага худалдааны үеэр гаргасан байна.

Т.Энхэлээ