“Ерөнхий боловсролын дунд сургуулийн сурагчид хар тамхи, мансууруулах төрлийн бодис хэрэглэж байжээ.

Тодруулбал ЭЦГ-ын Хар тамхитай тэмцэх хэлтсээс “Ерөнхий боловсролын дунд сургуулийн сурагчид хар тамхи, мансууруулах төрлийн бодис хэрэглээд байна” гэх мэдээллийг шалгахад 12-р ангийн сурагч Г, Т, Х нар нь мансууруулах үйлчилгээтэй ургамлын төрөлд орох каннабисийг хууль бусаар олж авч, хадгалан, хэрэглэж байсан болох нь тогтоогджээ. Эдгээр сурагчид нь 17-18 насны залуучууд байсан байна.

Түүнчлэн ЭЦГ-ын Хар тамхитай тэмцэх хэлтсээс “БГД-ийн 17-р хорооны нутаг дэвсгэрт хар тамхи, мансууруулах бодис зарж борлуулан, хэрэглэж байна” гэх мэдээллийг шалгахад Монгол Улсын иргэн С, О, Э нар нь бүлэглэн хар тамхи, мансууруулах бодисын төрөлд орох “ICE” буюу МӨС-ийг хууль бусаар олж авч, бусдад зарж борлуулан, хэрэглэж байсан болох нь тогтоогдсон ба хэргийн газраас ICE буюу МӨС, Гашиш, Экстази болон мансууруулах бодис хэрэглэхэд ашиглагддаг эд зүйлс илэрч хураагджээ.

Дээрх үйлдэлд мөн  эрүүгийн хэрэг үүсгэн шалгаж байгаа аж. Мөн тус хэрэгт холбогдсон иргэн С, Э нарт эрүүгийн хуулийн 192.1, 192.3.4-т заасан гэмт хэрэгт яллагдагчаар татагдан прокурорын хяналтанд байх хугацаандаа дахин хар тамхи, мансууруулах бодистой холбоотой гэмт хэрэг үйлдсэн болох нь шалгалтын явцад тогтоогдсон байна.