Өнөөдөр Монгол улсын Ерөнхийлөгч Ц.Элбэгдоржийн зарлигаар Буриадын уран бүтээлч Даши Намдаковт Төрийн соёрхол хүртээлээ.

Даши Намдаков нь алдартай уран барималч бөгөөд морь унасан Чингис хааны хөшөөг Лондон хотод босгосон билээ. Уг хөшөө нь Лондон хотноо байрлаж байгаад УИХ-ын гишүүн Д.Бат-Эрдэнэд зарагдсан юм. Д.Бат-Эрдэнэ гишүүн уг хөшөөг удахгүй Монголдоо авчирна гэсэн мэдээлэл байгаа.

Дэлхийн түүхэн дэх хамгийн гарамгай цэргийн удирдагчдын нэг болох Чингис хааны хүрэл хөшөө нь зураачийн сүүлийн төсөл юм. Ази тив олон жилийн турш Намдаковын уран бүтээлийн гол сэдэв болжээ. Түүний энэхүү бүтээл нь хөдөлгөөнгүй мэт боловч гадагш тэмүүлсэн нуугдмал хөдөлгөөн, дотоод эрч хүчийг харуулснаараа онцлог аж. Чингис хааныг морины нуруун дээр тэнгэрээс бууж байгаа байдлаар дүрсэлсэн уг хөшөө нь Чингис хааны алдартай хөшөөнүүдийн нэг юм.

Т.Энхэлээ