Энэ сарын 5-ны өдөр Сэлэнгэ аймгийн Тэшиг суман дахь хилийн цэргийн ангийн хугацаат цэргийн хоёр алба хаагч оргосон.  

Манаанд гарах байсан Г. Б нар заасан хугацаандаа ирээгүй тул цагдаагийн байгууллагад дуудлага өгч, Сэлэнгэ аймгийн таван сум, Булган аймгийн нэг суманд самнан хайх ажиллагаа явуулснаар оргосон цэргүүдийн байршлыг тогтоосон байна.

Зэвсэгтэй, морьтой явсан хоёр албан хаагч Цагааннуур сумын иргэний машиныг буу тулган дээдрэмдэж зугтсан бөгөөд бүрэн автомат байлдааны зэвсэгтэй байсан учир цагдаагийн албан хаагчид тактикаар суурин газраас холдуулж, Шаамар сумын нутагт баривлах ажиллагааг зохион байгуулжээ.  

Одоогоор Г-г цагдан хориод байгаа бол Б эмнэлэг хэвтэн эмчлүүлж байгаа юм байна. 

Цэргүүдийг баривчлах ажиллагааны үеэр цагдаа болон иргэдийн амь насанд аюул учраагүй боловч иргэнээс дээрэмдсэн тээврийн хэрэгсэл, зугтах замыг хаахад дайчилсан портэр машин мөргөлдөж, онхолдсон байна. 

Баривчилгааг явуулахдаа дугуй хагалагч зэрэг тусгай төхөөрөмж ашиглажээ. Тэдэнд Эрүүгийн хуулийн тусгай ангийн 279.1-ээр эрүү үүсгэн шалгаж байгаа аж. Харин оргосон цэргүүд мэдүүлэхдээ "Цэргийн албанаас залхаад гэртээ харихын тулд цэргээс оргосон" хэмээжээ.