Дундговь аймгийн “Оюуны хөгжил” гэх хувийн цэцэрлэгийн тогооч ой хүрээгүй хүүг “Хоолоо идсэнгүй” хэмээн зодсон буй бичлэг цахим сүлжээгээр тарж олныг цочирдуулсан.

Уг хэргийн дуулиан намжаагүй байтал дахин орон нутагт дунд сургуулийн бага ангийн багш сурагчаа халуун будаагаар түлж, гэмтээсэн хэрэг гарчээ.

Эл хэрэг шинэ оны өмнөхөн Булган аймгийн Рашаант сумын дунд сургуульд болсон болохыг эх сурвалж мэдээлэв.

Тус сургуулийн бага ангийн багш "Үдийн цай" өгөх үеэрээ сурагчаа "Аягаггүй ирлээ" гэж загнаж, улмаар халуун будаа алган дээр нь хийж өгсөн байна. Зургаахан настай нэгдүгээр ангийн сурагч багшдаа загнуулсандаа айж халуун будааг нь асгачихгүйг хичээж удаан барьсанаас болж гараа гүн түлжээ.

Энэ байдлаас болж хүү сэтгэл санааны цочролд орж, татаж унадаг болсон байна. Харин сурагчаа түлж гэмтээсэн багшийн асуудлыг аймгийн Боловсролын газар тависнаар ажлаас нь халсан байна. Хэргийг хуулийн байгууллага шалгаж байгаа аж.