Ард санхүүгийн нэгдлийн гүйцэтгэх захирал Ч.Ганхуяг дуулиан дагуулсан “Улаанбаатар хэвлэх үйлдвэр”-ийн хувьчлалд оролцохыг эрмэлзэж нэлээд олон хүмүүсийг эгнээндээ нэгтгээд байсан ч хувьчлалд оролцож чадаагүй.

Тэгвэл тэрбээр даагаа нэхэж “Монгол шуудан”-гийн  хувьчлалд оролцож, тус компанийн саналын эрхтэй энгийн хувьцааны 17.38 хувийг авав.

“Монгол шуудан” ТӨХК-ийн 34 хувийг Монголын хөрөнгийн биржээр дамжуулан олон нийтэд нээлттэй хувьчлахаар болоод байсан бөгөөд хувьчлал өнгөрсөн баасан гарагт явагдсан юм.

Тухайн компанийн хувьцааг эзэмшихээр иргэд аж ахуйн нэгж байгууллагаас нийт 12 орчим тэрбум төгрөгийн захиалга ирсэн бөгөөд үүний 6.8 тэрбумыг “Ард” санхүүгийн нэгдэл өгөөд байсан билээ. Тэгвэл нээлттэй хувьчлалаар Ард санхүүгийн нэгдэл нийт 17,309,974 ширхэг хувьцаа худалдан авч “Монгол шуудан”-гийн  17.38 хувийг эзэмшихээр болов. 

Ч.Ганхуяг энэхүү хувьчлалд оролцсоны дараа “Монгол шуудан"-гийн эзэн нь төрөөр дамжуулаад ард түмэн байсан. Одоо бол Ард санхүүгийн нэгдлээр дамжуулаад Монголын ард түмэн болж байгаа. Хувьцааг анхнаасаа олон нийтэд хувьчилна гэсэн учраас Ард санхүүгийн нэгдэл 34 хувийг дангаараа эзэмших боломжгүй. 

Ард санхүүгийн нэгдэл “Монгол шуудан”-гийн түүхэн хувьчлалд оролцож, нийт 17,309,974 ширхэг хувьцаа буюу тус компанийн саналын эрхтэй энгийн хувьцааны 17.38 хувийг худалдаж авлаа. Бидэнд дахиад хувьчлах 100 аж ахуйн нэгж байгаа. Нууцаар, хаалттайгаар хэнд ч мэдэгдэхгүйгээр, хэдхэн олгиархи дарга нар хийгээд нэг л өдөр сэрсэн чинь “Өө энэ чинь хувийнх болчихсон байна гэдэг” цаг үеийг сая оршууллаа. Энэ үйл ажиллагааг явуулсан УИХ, Засгийн газар, ТӨХ, Санхүүгийн зохицуулах хороо, Үнэт цаасны төлбөр тооцоо, төвлөрсөн хадгаламжийн төв, Хөрөнгийн биржийн удирдлага ажилтнуудад баяр хүргэмээр байна” гэсэн юм.

Б.Энхжин