“Херо” энтертайнмэнтаас мэдээлэл хийхээр болжээ. Учир нь өнгөрсөн амралтын өдрүүдэд сошиал ертөнцөөр “Херо” энтертайнмэнтийн “Монгол тулгатны 100 эрхэм” нэвтрүүлгийн Монгол Улсын Ерөнхийлөгч асан, МАХН-ын дарга Н.Энхбаярын оролцсон нэвтрүүлгийн хар материал цацагдаж, олны анхаарлыг татсан.

Тиймээс алдагдсан энэхүү материалын талаар “Херо”-гийнхон өөрсдөө нотолж, сэрэмжлүүлгийг мэдээллийн хэрэгслээр байршуулсан юм.

Уг сэрэмжлүүлэгт “Монгол тулгатны 100 эрхэм”, “Чухал 100 сэдэв”, “Монгол Тулгатны 100 дуу”, “Уран бүтээлийн нэгдүгээр нэгдэл” нэвтрүүлгүүдээр үзэгч олон түмэнд танил болсон “ХЕРО” энтертайнмэнт студийн оюуны өмч болох нэвтрүүлгүүдийн дүрс бичлэг болон бусад материалууд хулгайд алдагдсан тул оюуны өмчөөр хамгаалагдсан дээрх дүрс бичлэг, материалуудыг хэвлэл мэдээллийн хэрэгсэл, олон нийтийн сүлжээгээр нэвтрүүлэх, түгээх, цацах, бусдын хүртээл болгох зэрэг үйлдэл гаргахгүй байхыг сэрэмжлүүлж байна.

Хуулиар хамгаалагдсан оюуны өмчийн асуудалд анхааралтай хандаж, хууль бус үйлдэл гаргах талаар санал тавьсан, хүсэлт гаргасан, ятгасан, санаачилсан аливаа үйлдлийн талаар ХЕРО ЭНТЭРТАЙНМЕНТ студийн Info@hero.mn email хаягаар; 9444-5045, 8800-5045, 8801-2502 дугаар утсаар тухай бүр нь мэдэгдэж байхыг хүсч байна” гэжээ.

Тэгвэл эл асуудлаар өнөөдөр 12:00 цагаас сэтгүүлчдэд мэдээлэл хийхээр болжээ.