Шинэ Үндсэн хууль батлагдсаны 24 жилийн ойд зориулсан АИХ-ын депутат асан, Л.Лхагвасүрэнгийн нэрэмжит хууль, эрх зүйн олимпиадыг Хөвсгөл аймгийн Тариалан сумын төрийн албан хаагчдын дунд гурав дах жилдээ амжилттай зохион байгууллаа.
Тус олимпиадад Тариалан сумын ЗДТГ, ИТХ, ЕБС, СӨБ, Цаг-Уур, Соёлын төвийн нийт 113 төрийн албан хаагч оролцсоноос сумын “Эрүүл мэндийн байгууллага” нийлбэр дүнгээр 1 дүгээр байр, сумын ЗДТГ-ын хамт олон 2 дугаар байр, Тариалан ЕБС-ын хамт олон 3 дугаар байр эзэлж, өргөмжлөл, шилжин явах цом, мөнгөн шагналын эзэн болов. Хувь хүний амжилтаар ЗДТГ-ын дотоод ажил хариуцсан ажилтан Б.Нямдалай 44 оноогоор 1 дүгээр байр, ЭМТөвийн их эмч Х.Эгиймаа 42 оноогоор 2 дугаар байр, ЗДТГ-ын татварын байцаагч Б.Чулуунчимэг 3 дугаар байр эзэллээ.
Харин Тусгай байрын шагналд Э.Эрдэнэбат /Олон нийтийн цагдаа/, Б.Пүрэвдорж /Санхүүгийн албаны дарга/, З.Батцоож /ЭМТөвийн бага эмч/, Ч.Нарангэрэл /Тавантолгой багийн Засаг дарга/, Д.Дуламсүрэн /ЭМТөвийн дарга/, Ж.Мягмарсүрэн /ЕБС-ийн түүх нийгмийн ухааны багш/ нар тус, тус шалгарч өргөмжлөл мөнгөн шагналаар шагнуулав.
Хууль эрх зүйн олимпиадыг Л.Лхагвасүрэн агсны гэр бүл, үр хүүхэд, ах дүү нар нь сумын ИТХ, ЗДТГ-тай хамтран жил бүр зохион байгуулдаг уламжлалтай юм.
Төрийн албан хаагчдын хууль эрх зүйн олимпиад нь төрийн албан хаагчдын хууль эрх зүйн мэдлэг боловсролыг дээшлүүлэхэд чухал дэмжлэг болж байгаа бөгөөд төрийн албан хаагчдыг чадавхижуулах, салбарын чиглэлээр хууль эрх зүйн мэдлэгийг дээшлүүлэхэд чухал нөлөө үзүүлдэг хэмээн зохион байгуулагчид хэлж байна.
Улс, нийгмийн нэрт зүтгэлэн Л.Лхагвасүрэн нь төрийн албанд тасралтгүй 40 жил ажиллахдаа Хөвсгөл аймгийн Тариалан сумын нарийн бичгийн дарга, ҮЭ-ийн дарга, Багийн засаг дарга, Тамгын газрын дарга, ИТХ-ын дарга зэрэг албан тушаал хашиж байсан юм. 1992 онд АИХ депутатаар 397 тойргоос сонгогдож Ардчилсан шинэ үндсэн хуулийг батлалцсан. Түүний хөдөлмөрийг үнэлж Төр захиргааны тэргүүний ажилтан, Хөдөлмөрийн хүндэт медаль, Алтан гадас одон, Хөдөлмөрийн гавъяаны улаан тугийн одон, Ардын хувьсгалын ойн медалиуд, зэвсэгт хүчний ойн медалиудаар шагнаж байжээ.
Т.Хулан
