“ПюрХаус”, “ЖигүүрГранд”, “ЮБП”, “Зүүн хүрээ шилтгээн”, “АО Жаргалант”, “Ричфортун”, “Блю Скай”, “Ажигана” зэрэг барилгын компаниуд өнгөрсөн онд нийт 70 орчим мянган хэрэглэгчээс эрчим хүч ашигласны төлбөрийг илүү бодон авч, тэрбум орчим төгрөгийн хохирол учруулжээ.

Энэ талаар өнөөдөр  Монголын хэрэглэгчдийн эрх ашгийг хамгаалах нийгэмлэгүүдийн нэгдсэн холбооны Ерөнхий нарийн бичгийн дарга Д.Чулуунбаатар, холбооны Ерөнхийлөгч А.Ариунболд нар мэдээлэл хийв.

Өнгөрсөн 2015 онд 7500 өрх буюу 70 мянган хэрэглэгчээс эрчим хүч хэрэглэсэн төлбөрийг аж ахуйн нэгжийн тарифаар тооцон авч нийт нэг тэрбум орчим төгрөгөөр хохироосон байна. Өөрөөр хэлбэл аж ахуйн нэгжээс 1К/ц эрчим хүчийг 128.50 төгрөгөөр тооцон авдаг бол иргэдээс 1K/ц эрчимхүч 98.40 төгрөгөөр тооцдог байна. Ийнхүү ААН-ийн тарифаар тооцвол нэг өрхөөс дунджаар таван мянга орчим төгрөгийг сар бүр хууль бусаар авч байсан аж.

Уг үйлдэл нь тухайн барилгын компани иргэн Эрчим хүчний тухай хуулийн 12.1, Аж ахуйн үйл ажиллагааны тусгай зөвшөөрлийн тухай хуулийн 15.8.3, Хэрэглэгчийн эрхийг хамгаалах тухай хуулийн 12.9 заалтыг тус тус зөрчиж байгаа юм байна.

Түүнчлэн Монголын хэрэглэгчдийн эрх ашгийг хамгаалах нийгэмлэгүүдийн нэгдсэн холбооноос өмнө нь эл хэргийн талаар УИХ, Өргөдлийн байнгын хороо, Эрчим хүчний зохицуулах хороонд хандаж байжээ. Гэсэн ч ямар нэгэн арга хэмжээ аваагүй тул дахин Өргөдлийн байгын хороонд хандахаа мэдэгдлээ.