Үндэсний их баяр цагаан сарын бэлтгэл аль хэдийнэ эхэлжээ. Сар шинийн баярт зориулсан худалдаа наймааны салхийг хагалж, “Ёндоотой Цагаан сар-2016” үзэсгэлэн худалдаа Монголын "Үйлдвэрчиний эвлэлийн соёлын төв" ордонд энэ сарын 18-наас 24-нд зохион байгуулагдаж байна. Долоо хоног үргэлжлэх үзэсгэлэн худалдаанд үндэсний үйлдвэрлэгчид, хөдөө орон нутагт өрхийн бизнес эрхлэгчид голчлон оролцож байгаа юм.

Нийт 80 гаруй байгууллага, жижиг дунд үйлдвэрлэгчид оролцож байгаа үзэсгэлэн худалдаанаас сар шинийн идээ шүүс, ус ундаа, архи дарс болоод сар шинийн гарын бэлэг, өмсөх гоёлоо ч авч болох ажээ. Сар шинийн бэлтгэлээ эрт хийж зардалаа хэмнэхийг уриалан үйлдвэрийн АНХДАГЧ ҮНЭЭР " Ёндоотой Цагаан сар 2016" үзэсгэлэн худалдааг зохион байгуулж байна.

Тэгвэл бид сар шинийн сурвалжлаагаар тус үзэсгэлэн худалдааг зорьж дараах мэдээ мэдээллийг бэлтгэлээ.

Цагаан идээ, хэвийн боов, гар урлалын бүтээгдэхүүнүүдээс эхлээд сар шинийн идээгээ чимэглэх тавгийн чихэр, сүү, тараг гээд олон төрлийн бүтээгдэхүүн дэлгэгджээ.

Ингээд цагаан идээ, арвайн гурилаараа Монголдоо танигдсан Говь-Алтайн иргэн Д.Өлзий-Оршихтой уулзаж зарим зүйлийг тодрууллаа. Тэрбээр “Би Говь-Алтай аймгаас ирээд нийслэлчүүддээ Алтайн сайхан брэнд бүтээгдэхүүнээрээ үйлчилгээ үзүүлж байна. Манай Алтайд олон сайхан бүтээгдэхүүн хийдэг. Тухайлбал, Чандмань, Тайшир суманд тарьдаг Халтар арвайн гурил, Цулхирын гурил гээд элэг, цөс, бөөр, сахарт сайн гурил зарагдаж байна.

Нойргүйдэл, цус багадалт, ядаргаанд сайн Сулийн гурил гэж байна. Мөн манай Алтайчууд чипсэн ааруул хийж байгаа. Хүүхдүүдэд төмс идүүлж байхаар кальцийг нь нөхөх зорилготой чипсэн загвартай ааруул бий. Сар шинийн баярт зориулсан бэлгийн хайрцаг савалгаатайгаар ч зарагдаж байна. Нийслэлчүүд манай бүтээгдэхүүнүүдийг утсаар яриад, зорьж ирж авч байна. Нийслэлчүүддээ арвайн гурил, чипсэн ааруул, эрүүл мэндийн бүтээгдэхүүнээ аваарай гэж уриалж байна” гэлээ.

Говь-Алтайн брэнд чипсэн ааруулны хувьд савалгаанаасаа шалтгаалаад харилцан адилгүй үнэтэй байгаа юм байна.

Харин арвайн гурил 3кг нь 3500, 5кг нь 5000 мянган төгрөгөөр худалдаалагдаж байна.

Мөн тус үзэсгэлэн худалдаанд “Талх чихэр”, “Суман гүн”, “Бамбууш” зэрэг компанийн сар шинийн хэвийн боов, еэвэн үйлдвэрийнхээ үнээр зарагдаж байгаа юм.

Цаашлаад дээл хувцас, сар шинийн бэлгийн худалдаа ч хийгдэж байсныг дуулгах нь зүйтэй биз ээ.
Харин чихэр, жимс төдийлөн зарж харагдахгүй байлаа. Гэвч “Бор шоон оргил” ХХК ОХУ-ын үйлдвэрээс шууд  оруулж ирдэг өнгө будаггүй, сахарын агууламжгүй, органик чихрийн худалдаа явуулж байлаа.  Өнгө үзэмж, амт чанар сайтай байгааг үйлчлүүлэгчдийн зүгээс онцолж байна.

Мөн зөгийн балтай вафль анх удаа худалдаалж эхэлснээрээ онцлог байгаа аж.

Үнийн хувьд 7000-20000 мянган төгрөгөө зарагдаж байна.

р

Цаашлаад “Монгол Алтайн Барагшун” үзэсгэлэн худалдаанд оролцож байна.

Барагшун нь 40 гаруй макро, микро эрдэс бодис болон олон төрлийн витамин, амин хүчил фермент органик хүчил агуулдаг тул биеийн , бодисын солилцоог зохицуулах эд эсийн нөхөн сэргээлт, биеийн эсэргүүцлийг сайжруулах, төрөл бүрийн үрэвсэлт өвчнийг үүсгэгч бичил биетнийг давамгайлах бактерийн эсрэг үйлчлэлтэй юм.

Мөн Монголд анх удаа барагшуныг шингэн хэлбэрээр бүх насны хүмүүс шууд ууж болох биологийн нэмэлт бүтээгдэхүүн хэлбэрээр үйлдвэрлэж байна.

Нэг уут барагшун 800 төгрөгөөр худалдаалагдаж байна.

Түүнчлэн, “Тэрэлж шонхор” компаниас өөрсдийн брэнд болсон Хатан цайгаа үзэсгэлэн худалдаанд дэлгэсэн байлаа. Хатан цайны хувьд хийц, амт чанар сайтай юм. Улмаар сар шинийн баярыг тохиолдуулаад сав баглаа боодлоо шинэчилж, бэлгийн хайрцагтай болсон байна.

Энэхүү бүтээгдэхүүн нь мөн үйлдвэрийн үнээр зарагдаж байгаа аж. Арвайтай ногоон цай, сахар гээд олон төрлийн бүтээгдэхүүнүүд ч нэмэлтээр худалдаалагдаж байна.

Ийнхүү "Үйлдвэрчиний эвлэлийн соёлын төв”-д болж байгаа сар шинийн баярт зориулсан үзэсгэлэн өргөн дэлгэр болж байна.

Удахгүй ээлжит сурвалжлагыг хүргэх болно.

Д.Ундрах /24tsag.mn/