Нийслэлийн Баянгол дүүргийн иргэдийн амар тайван ажиллаж амьдрах нөхцлийг бүрдүүлэх, иргэд аж ахуйн нэгж байгууллагыг аливаа гэмт халдлага, болзошгүй аюулаас бүрэн урьдчилан сэргийлэх зорилгоор Теле камерын нэгдсэн хяналтын төвийг Баянгол дүүргийн Цагдаагийн 1 дүгээр хэлтэст байгуулжээ.

Ингэснээр дүүргийн хэмжээнд байрладаг 415 камерыг нэгдсэн байдлаар 24 цагийн турш хянах ба шинээр суурилуулсан камерууд нь дүрс нягтралын хувьд өндөр чанартай, тоон системээр өдөр шөнө алинд ч гэрэлтүүлэг шаардлагагүйгээр өнгөтөөр бичиж,  цаг агаарын эрс тэс нөхцөлд ажиллах бүрэн чадвартай, нэгдсэн системээр хяналтын төвөөс удирдаж, гэмт хэрэг илэрсэн тохиолдолд хэрэгтний царайг татаж таних бүрэн боломжтой.

Дээрх камеруудын 180 гаруй нь орон сууцны хорооллыг, 203 нь гудамж зам талбай, олон нийтийн газрыг, 28 нь гэр хорооллын гудамжийг хянаж эхэлжээ. Энэхүү хяналтын төв нь нэмж 1024 камер, 128 сүлжээний төхөөрөмж  суурилуулах боломжтой ба өндөр хөгжилтэй орнуудын камерын нэгдсэн сүлжээтэй дүйцэхүйц болох суурь болжээ.

Энэхүү үйл ажиллагаа нь нийслэлдээ жишиг болж 100 хувь камержсан “Аюулгүйн гудамж”-ыг бий болгох, гэмт хэрэгтнийг хяналтын камераар эрэн сурвалжлах, аливаа гэмт хэрэг, гэмт халдлагыг нэн даруй илрүүлж ойролцоох хөдөлгөөнт эргүүл болон цагдаагийн тасагт шуурхай мэдээлж техник технологийн хөгжлийг ашиглан ажиллах боломжтой болж байна.