Булган аймгийн Прокурорын газраас 2016 оны 01 дүгээр сарын 21-ний өдөр тус аймгийн Цагдаагийн газрын хэрэг бүртгэх, мөрдөн байцаах тасгийн хэрэг бүртгэгч, мөрдөн байцаагч нар болон захиргааны зөрчлийн хэрэг бүртгэх ажиллагаа явуулах эрх бүхий нийт 135 албан тушаалтнуудад “Прокурор, Цагдаагийн байгууллагын хамтын ажиллагааг сайжруулах”, “Хэрэг бүртгэх, мөрдөн байцаах ажиллагаа болон эрүүгийн хэргийг шийдвэрлэхэд гарч буй хүндрэл бэрхшээл, түүнийг хэрхэн шийдвэрлэх” болон цаашид авч хэрэгжүүлэх арга хэмжээний талаар уулзалт, зөвлөгөөн хийжээ.

Зөвлөгөөний хүрээнд 2015 онд хийсэн ажлын үр дүн, эерэг болон сөрөг үзүүлэлтүүдийг дэлгэрэнгүй хэлэлцэж, хэрэг бүртгэгч, мөрдөн байцаагч, захиргааны зөрчлийн хэрэг бүртгэх ажиллагаа явуулах эрх бүхий нийт албан тушаалтнуудад гаргаж буй алдаа зөрчил, анхаарч ажиллах асуудлуудын талаар дэлгэрэнгүй мэдээлэл , үүрэг чиглэл өгсөн байна.

Прокурорын байгууллагаас 2016 онд дэвшүүлсэн зорилт, түүний хэрэгжилтийг хангах арга зам, тус орон нутгийн хэмжээнд гарч буй гэмт хэргийг хуулийн хугацаанд шуурхай шийдвэрлэж байх, хэрэг бүртгэх, мөрдөн байцаах болон захиргааны зөрчлийн хэрэг бүртгэх ажиллагааг сайжруулж, эрчимжүүлэх зохион байгуулалтын арга хэмжээ авч ажиллах талаар анхааруулж, танилцуулжээ.