Барилга хот байгуулалтын яамнаас захиалж  “Бэрэн констракшн энд автомэшн” компанийн гүйцэтгэсэн “Хангай” хотхоны харуусал дагуулам дүр зургийн талаар энэ удаад хөндөж байна.

Тус хотхон нэгдсэн харуул хамгаалалт, хогийн цэг байхгүйгээс гадна бүх байрнуудын салхивч нам дор хийгдсэн байна. Мөн цахилгааны утсыг хөлд тээглэж мэдэхээр ил задгай гүйлгэсэн нь оршин суугчид хэзээд галд өртөж мэдэхээр. Энэ бол чанаргүй барилгын наад захын дүр зураг. Тэр ч бүү хэл хогийн цэг байхгүйгээс болоод энд тэндгүй ил задгай хог хөглөрнө. Хотхон гэх нэртэй ч үнэндээ хогийн цэг гэлтэй. Муу усны нүх нь хальж мөсөн гулгуур болсныг харвал захын хорооллын эзэнгүй дүр зураг санагдах.

Дээрээс нь тэсэхийн аргагүй хүйтэн тул оршин суугчид өдөр шөнөгүй халуун тенн асааж бүлээцдэг гэх. Уг нь  “Бэрэн констракшн энд автомэшн” компани анх нэг блоктоо 720 айлын 12 давхар дөрвөн блок барихаас эхний ээлжийн 1080 айлын орон сууцыг энэ оны гуравдугаар улиралд ашиглалтад оруулна хэмээн 2013 оноос эхлэн захиалгаа авчээ. Гэвч оршин суугчдын эрүүл аюулгүй байдлыг хангахааргүй, эрсдэлтэй орон сууцыг барьж иргэдийг хулхидаж орхижээ.

Энэ асуудлаар оршин суугчдын төлөөлөл иргэн А.Ганбат ийн ярьж байна.

-Анх би 2014 онд “Бэрэн констракшн”-тай гэрээ хийсэн юм. Гэвч 2015 оны хоёрдугаар улиралд ашиглалтанд оруулна гэсэн ч хугацаагаа сунгасаар байгаад өнгөрсөн арванхоёрдугаар сард дутуу барилгыг ашиглалтад оруулсан. Гэтэл амьдраад эхэлтэл гэрээс өмхий ханхлаад болдоггүй. Тэгээд гүйцэтгэл хийсэн “Бээжин” гэх компаниас лавлатал салхивчаа намхан хийсэн гэх хариулт өгсөн. Харин “Бэрэн констракшн”-ы хувьд барилгын гүйцэтгэлийг хянах тендер авсан компани гэж байгаа ч огтхон ч хяналт тавиагүй. Одоо энэ хоёр компани дутуу баригдсан барилгаа нэг нэгэн рүүгээ чихэж дунд нь иргэд бид хохироод байна. Анх гэрээ байгуулахдаа гадна тохижилт, хүүхдийн талбай зээргээ их сайхнаар сурталчилж байсан. Одоо та бүхэн харж байгаа байх. Юун хүүхдийн талбай. Барилгын ажлаа ч дуусгаагүй байгаа биз дээ. Энэ тэндгүй өндөр хүчдэлийн утаснууд газраар хөглөрсөн. Цас борооноор хүн энд гишгэвэл өндөр хүчдэлд цохиулж нас барахад ойрхон байгаа биз дээ.

-Энэ тохижилтыг одоо ямар газар хийж байгаа вэ?
-Оршин суугчдаас СӨХ-ийн хуримтлалын мөнгө хураагаад эхэлсэн. Уг нь хуулиараа бол шинэ орсон барилгыг дор хаяж нэг жилийн дараа засварын хуримтлалын мөнгө хураах ёстой. Жилийн дотор ямар ч завсар орох ёсгүй. Гэтэл одоо биднээс мөнгө хурааж өөрсдийнхөө хийх ёстой болон хийгээгүй ажлаа хийлгэх гэж байна.

-Анх гэрээ хийсэн хугацаанаасаа хоцорч байраа хүлээлгэж өгсөн гэсэн. Та бүхэн алдангиа тооцуулж авсан уу?
-Анх гэрээ байгуулахдаа төлбөр төлөх график гаргаж тэрнийхээ дагуу би төлбөрийнхөө 90 хувийг өгсөн. Бэрэнгээс түлхүүр гардаж авахдаа үлдсэн 10 хувиа өгөх ёстой байсан. Гэсэн ч гэрээний дагуу байр хүлээлгэж өгөх ёстой хугацаа хойшилсоор байгаад алданги нь 11 сая төгрөг болж бид тэр мөнгөө нэхсэн. Гэтэл биднийг үлдсэн 10 хувиа өгж байж байрныхаа түлхүүрийг ав гэсэн. Зарим айлуудын түлхүүрийг “10 хувиа өгөхгүй бол байр буцааж хураахад гомдолгүй” гэсэн бичиг хүртэл хийлгүүлж авсан байна лээ. 90 хувиа өгчихөөд байхад хүртэл шүү дээ.

-Одоо тэгэхээр та  үлдсэн 10 хувиа өгж байж түлхүүрээ авна гэсэн үг үү?
-Үгүй ээ. Би 10 хувиа өгөөгүй байгаа. Бэрэнгээс алданги болох 10 сая төгрөгөө өгч байж өгнө.

-Энэ асуудлаар та хуулийн байгууллагад хандсан уу?
-Ах нь бүр гайхаад байна. Анх энэ барилгыг өнгөрсөн арванхоёрдугаар сард улсын комисс чухам яаж хүлээж авсан юм бол гэдгийг гайхаад байна. Уг нь захиалагч нь Барилга хот байгуулалтын яам ш дээ. Гэтэл одоо улс ч тэр энэ хоёр компани ч тэр бие бие рүүгээ буруугаа тохож  иргэд бид л хохирсоор байна.

-Бэрэн компанитай уулзахад юу гэж байна?
-Байрны тохижилт болон гэрээний дагуу алданги мөнгөө олж авах гэж оршин суугчдаа уриалаад эрх ашгаа хамгаалах гэхээр намайг дарамталж эхэлсэн. Тэд бүр “Гэрийн чинь хаягийг мэднэ аятайхан байгаарай” гэж заналхийлсэн.

-Ингэхэд танайх байрандаа хэзээ орсон бэ?
-Манайх байрандаа ороод нэг сар болж байна. Гэтэл одоо хүртэл Хангай СӨХ-д хүлээлгэж өгөөгүй байна. Гадаа тохижилт юу ч байхгүй, ямар ч гэрэлтүүлэг байхгүй. Орцны үүдээр дүүрэн хог үнэхээр хэцүү байна.  Дээр нь гадаа дандаа ил өндөр хүчдэлийн утаснууд байгаа болохоор харанхуйд гэрэлгүй явах нь аюултай байна.

Дээрх асуудлаар байрны оршин суугчдийг санал гомдлоо хэлмэгц айлган сүрдүүлж, заналхийлэх болсон гэнэ. Тус хотхоны зах зээлийн үнэ м.кв нь 2 сая 200 мянган төгрөг. Харин грашны үнэ 35 сая төгрөг юм байна. Гэвч улсын комисс 21 хоногийн турш ажиллаж байж хүлээж авсан гэх тус барилга үнэ шигээ чанартай байж чадаагүйд оршин суугчид гомдолтой байна.

Д.Ундрах /24tsag.mn/