Зам тээврийн яамны төрийн нарийн бичгийн дарга асан Б.Батзаяа нарын хэрэгт холбогдуулан нэгэн иргэний асуудлыг шалгаж эхэлжээ. Тодруулбал, Төмөр замын шинэ бүтээн байгуулалтын ажлын 50 хувийг гүйцэтгэсэн гэх “Шинэ халхын төмөр зам” буюу “Кэй Эйч Эн Ар” компанийн ерөнхий захирал асан З.Баасандорж тус ажлыг гүйцэтгэхээр бусдаас их хэмжээний зээл авсан байна.

Ингээд ажлаа гүйцэтгэсэн ч  санхүүжилт улсаас орж ирээгүйн улмаас иргэн З.Баасандорж их хэмжээний өрөнд орсон гэнэ.

Улмаар өрөө төлж чадахгүйд хүрсэн тэрээр 2013 оны арваннэгдүгээр сарын 05-ны өдөр Баянзүрх дүүргийн XII хорооны нутаг Амгалан Чулуун овооны ойролцоо хэвлийн тус газраа өөрийгөө хутгалж, УИХ-ын даргын зөвлөх А.Гансүх, УИХ-ын гишүүн Х.Баттулга нарт гэрээслэл бичиж үлдээсэн аж.

Тэрээр ийн гэрээслэл бичиж амиа хорлох үйлдэл хийснээсээ хойш арав хоногийн дараа Төрийн нарийн бичгийн дарга асан Б.Батзаяагийн албан өрөөнд дахин амиа хорлохыг завдсан аж. Энэ асуудлаар тухайн үед ар гэрийнхэн нь цагдаагийн байгууллагад хандсан ч тэгсхийгээд дарагдаад өнгөрчээ.

Харин З.Баасандоржийн хуулийн багийнхан эл асуудлаар шүүхэд нэхэн хандахад өнгөрсөн оны аравдугаар сараас эхлэн асуудлыг хэлэлцэж эхэлсэн байна. Ингээд шүүхээс “Монголын төмөр зам” ТӨХК-ийн гэрээний дагуу төлбөрөө алдангийн хамт нэхэмжилж 4.8 тэрбум төгрөгийг 7.2 тэрбум болгон төлөх ёстой гэх шийдвэрийг гаргасан байна.