Мэргэжлийн хяналтын ерөнхий газраас сэрэмжлүүлэг гаргаж байна. Тус сэрэмжлүүлэгт Цагаан сарын баяр болох гэж байгаа энэ үед иргэд ОХУ-руу зорчихдоо Улаан-Үд, Эрхүү орчмоос оросын виски,  коньяк, архи зэргийг гаалийн баталгаагүй дэлгүүрээс худалдан авч, амь нас, эд хөрөнгөөрөө хохирохгүй байхыг анхааруулжээ.

Учир нь ОХУ-ын Красноярск хотод өнгөрсөн долоо хоногт 11 хүн хуурамч архинд хордсон байна. Үүнээс өмнө буюу 2015 оны арваннэгдүгээр Красноярскт чанаргүй, хуурамч согтууруулах бүтээгдэхүүний улмаас 18 хүн хордож нас барсан юм. Иргэдийн аминд хүрсэн хуурамч архинуудын тухайд манай улстай хил залгаа  Эрхүү, Улаан-Үд хавиар тархсан талаар тус улсын хууль хяналтын байгууллагууд мэдээлжээ.  “Москва” агентлагийн уламжилснаар хойд хөршийн нийслэлд гэхэд 2015 онд чанаргүй, хуурамч согтууруулах ундаанд 768 хүн хордож нас барж, 800 гаруй хүн хордлогын улмаас эмнэлэгт хэвтжээ. Хордож эмнэлэгт хэвтсэн иргэдийн 158 нь насанд хүрээгүй хүн байгаа аж. Цагдаа нар 500 мянга орчим шил чанаргүй, хуурамч архи хураан авсан байна. Гэмт этгээдүүд хууль бус бүтээгдэхүүнээ ОХУ-ын баруун хязгаараас зүүн хязгаар руу тээвэрлэж байгаад баригдсан тохиолдол олон бүртгэгджээ. Москвагийн худалдаа үйлчилгээний хэлтсийн төлөөлөгчид иргэдийг хувь хүнээс бус албан ёсны зөвшөөрөлтэй дэлгүүрээс худалдан авалт хийхийг онцгойлон сануулсан байна.

Манай улсад энэ төрлийн хуурамч, чанаргүй бүтээгдэхүүн орж ирэх магадлал өндөр байгаа аж. Монгол Улс ОХУ-тай 2015 оны нэгдүгээр сараас харилцан визгүй зорчдог болсноос хойш иргэдийн дунд худалдаа арилжаа нэмэгдэж, холбогдох албаныхан хуурамч, чанаргүй архи согтууруулах ундаа орж ирж болзошгүйг анхааруулж байна.

Мөн сар шинээр монголчууд Эрээний цөөхөн мо-гийн үнэтэй, өнгө үзэмж муу оймс болон сүрчиг гэх мэт чанаргүй барааг бие, биедээ бэлэг болгон өгдөг. Энэ мэт чанаргүй бараанаас татгалзаж аль болох үндэсний үйлдвэрийнхээ бүтээгдэхүүнийг Цагаан сарын бэлгээр сонгохыг мөн уриалжээ.

Тиймээс үүсээд буй нөхцөл байдалтай холбоотойгоор мэргэжлийн байгууллагаас доорх сэрэмжлүүлэг гаргасан байна.  

МХЕГ-ын ОНХ мэргэжилтэн Т.Балжинням:- Иргэд өөрсдөө ОХУ руу зорчихдоо хамаатан садандаа өгөхөөр хувийн хэрэгцээний зорилгоор нэг, хоёр шил архи авч орж ирдэг. Энэ нь мэргэжлийн хяналтын байгууллагаар төдийлөн шалгагдаад байдаггүй. Учир нь гаалийн тухай холбогдох журмаараа татвараас чөлөөлөгддөг. Мөн хувийн хэрэгцээнд гэдэг болохоор хил дээр саатуулах эрхзүйн үндэслэл байдаггүй.

ШӨХТГ-ын байцаагч Д.Гантөмөр: -Архи согтууруулах ундаа бол хүн хордуулах хорт чанар нь өндөр байдаг учраас ийм төрлийн бараа бүтээгдэхүүнд маш анхааралтай хандах, баталгаатай, гаалийн бүрдүүлэлт бүрдсэн акци бүхий экспортын бараа бүтээгдэхүүнийг хэрэглэх нь зөв.

Т.Энхэлээ