Жил бүрийн Сар шинийн баярын өмнө Засгийн газраас "Улсын сайн малчин"-ыг тодруулдаг. Үүний дагуу ирэх баасан гарагт Засгийн газраас Улсын сайн малчдыг зарлахаар болжээ. 

Өнгөрөгч 2015 оны хувьд манай улсад түүхэндээ хамгийн өндөр буюу 18 сая төл мал хүлээн авсан. Үүнийгээ дагаад сайн малчдын тоо ч мөн нэмэгдсэн байна. Түүнчлэн энэ жилийн хувьд "Улсын сайн малчин"-ы цол тэмдгийг эхнэр, нөхөр хоёрт нь хамтдаа гардан авахаар болжээ.

Энэ талаар ХХАА-н сайд Р.Бурмаа “Улсын сайн малчныг малаа өсгөсөн байдлаас гадна малын ашиг шимийг нэмэгдүүлсэн, туслах малчин ажиллуулсан, нийгэмд тустай ажил хийсэн зэргийг харгалзан үзэж шалгаруулдаг. Харин энэ бүхнийг өрхийн тэргүүн ганцаараа биш гэр бүл хамтаараа хийж бүтээсэн байдаг. Тиймээс эхнэр, нөхөрт хамтад нь өгөхөөр болсон” гэдгийг дуулгалаа. 

"Улсын сайн малчин"-ы өргөмжлөл нь өрхийн тэргүүний нэр дээр байх бөгөөд эхнэр, нөхөр хоёрт ижилхэн тэмдэг зүүлгэж өгөх юм байна.