Аюулгүй байдал, гадаад бодлогын байнгын хорооны өнөөдрийн хуралдаанаар Ерөнхийлөгч Ц.Элбэгдоржоос өргөн мэдүүлсэн Монгол улс байнга төвийг сахих тухай болон холбогдох бусад хуулийн төслийг хэлэлцүүлгийг хийх байсан ч МАН-ын бүлгээс уг асуудлыг хойшлуулах саналыг гаргасан нь бусад гишүүдийн дэмжлэгийг авлаа.

Тухайлбал, УИХ-ын гишүүн Н.Энхболд “Энэ асуудлыг манай намын бүлэг дээр ярилцахад нухацтай хандаж нарийвчлан судалсны үндсэн дээр гишүүд нэгдсэн ойлголтод хүрч, итгэл үнэмшилтэй болж байж хэлэлцэх шаардлагатай гэсэн санал гарсан” гээд уг асуудлыг хэлэлцэх асуудлын дарааллаас хасч түр хойшлуулах санал гаргасан юм.

Мөн УИХ-ын дарга З.Энхболд уг хуулийн төслийг хэлэлцүүлэгт бэлтгэх үүрэг бүхий ажлын хэсэг гаргаж, УИХ-ын 2016 оны хаврын ээлжит чуулганаар хэлэлцүүлэх санал гаргасныг байнгын хорооны гишүүд дэмжсэн юм.

УИХ-ын нэр бүхий гишүүд уг хуулийг төслийг дахин сайтар хэлэлцэж эрдэмтэн судлаачдын оролцсон өргөн хүрээтэй судалгаа хийсний дараа батлах нь зүйтэй гэж үзэж буйгаа мэдэгдэж байгаа билээ.

Т.Энхэлээ