Цагаан сарын гол идээ шүүс болох ууцыг жигд сайхан болгох нь чухал. Тэгвэл ууцыг хэрхэн бэлтгэж чанадаг болохыг сонирхуулвал:
Урьдаар асуух нурууны хамар ясны хоёр талыг дагасан бүлхийг хөндлөн тасалж чанавал ууц татаж хотойдоггүй. Мөн нугасны нүхээр бүдүүн төмөр утас сүвлэж чанаж болно.
Том ууцыг тогоонд чанахад багтахгүй, чаналтыг сайн тааруулахгүй бол шалз чанагдах, тогоонд хүрсэн хэсэг нь хайрагдах зэрэг бэрхшээл гардаг. Иймд бүрхээр буюу модон торхоор чанах арга бий. Ингэхдээ тогоондоо дүүртэл ус хийгээд бүрхээрээ тавина.Ингээд ууцаа усанд лавхан дүрээд харцага нуруу талаар нь бүрхээрийн аманд дүүжлэн бэхэлж битүү чанана. Ингэхэд жигнэх чанах хосолж, хайрагдах хавчигдах бэрхшээлгүй болно.
Чаналтыг 30 минут орчим үргэлжлүүлэхэд жигд сайхан болно. Чанасан маханд наалдсан нитгэл үс хялгас зэргийг хусаж буюу түүж цэвэрлэхэд хэцүү байдаг тул шингэвтэр зуурсан гурил дээгүүр өнхрүүлэн наалдуулж авах нь хялбар арга юм.
Шүүс чанах ёсон: Есөн тамгат том тогоотой хүйтэн усанд (ууцнаас бусад) махаа үеэр нь буюу зарим газар мөчөөр нь салгаж хийгээд давсыг нь тааруулж (зарим газар бас жаахан цагаа нэмэн) зөөлөн галаар чанахдаа байн байн эргүүлж шүүрхийгүй болсон хойно гаргаж таваглаж тэвшлэнэ. Махны амтыг бууруулахгүйн тулд гэдэс дотор толгойг тусгайд нь чанана.
