Жолооны хуучин шар үнэмлэхээ солихыг Замын цагдаагийн газраас анхаарууллаа.

Замын цагдаагийн газрын Урьдчилан сэргийлэх, олон нийттэй харилцах хэлтсийн ажилтан ахлах дэслэгч Х.Одбаяр энэ талаар "Замын хөдөлгөөний аюулгүй байдлын тухай хуулийн 17 дугаар зүйлд Тээврийн хэрэгсэл жолоодох эрх хүчинтэй байх хугацааг зааж өгсөн байгаа. 17 дугаар зүйлийн  2-т “Монгол Улсын жолоодох эрхийн үнэмлэхийг 10 жил, Монгол Улсын олон улсын жолоодох эрхийн үнэмлэхийг гурван жилийн хугацаагаар олгоно. Олон улсын жолоодох эрхийн үнэмлэхийг олгох үед тухайн жолоодох эрхийн үнэмлэхний  хүчинтэй байх хугацаа гурван жилээс хэтрэхгүй байвал уг хугацаагаар хязгаарлана гэж заасан байдаг.  Хуучны шар  үнэмлэх дээр  хугацаа байдаггүй. Иймээс шар үнэмлэхийг Цагдаагийн Ерөнхий газрын Лицензийн төв сольж байна. Ингэхдээ ямар ч торгууль шийтгэл ногдуулаагүй. Замын цагдаагийн алба хаагчид шар үнэмлэхтэй жолоочид хэлж, анхааруулаад явуулж байгаа болохоос торгуулийн арга хэмжээ авахгүй байгаа" гэлээ.

Хуучин үнэмлэх солиулах шаардлагатай хүмүүс доорх баримтыг бүрдүүлэх аж.

Иргэний үнэмлэхний хуулбар эсхүл иргэний үнэмлэхний лавлагаа.

Цээж зураг 1% /3х4см/

Эрүүл мэндийн тодорхойлолт /цусны бүлэг тогтоолгосон./ 

Жолооны үнэмлэхний мөнгө 12500 төгрөг тушаасан баримт. /Дансны дугаар: 900012408, Хүлээн авагч банк - Төрийн сан банк, Хүлээн авагч байгууллага - ЦЕГ-ын СХГазар/

Шинэ үнэмлэхийг ажлын гурав хоногийн дотор хэвлэх боломжтой аж.