Иргэдэд цахим гарын үсгийг ирэх сарын 1-нээс олгож эхэлнэ. Ингэснээр иргэд бичиг цаасны ажил хөөцөлдөх үед заавал өөрийн биеэр очиж гарын үсэг зурах шаардлагагүй болох юм. 

Цахим гарын үсэгтэй болсон иргэд эхний ээлжинд төрийн зургаан байгууллагын үйлчилгээг авна. 

Ингэхдээ иргэдийн хувьд эрэлт ихтэй байдаг халамжийн үйлчилгээг эхний ээлжинд оруулжээ. Түүнчлэн Худалдан авах ажиллагааны газар, Зам тээврийн яам, Цагдаагийн ерөнхий газрын дэргэдэх Лицензийн төв, Нийгмийн халамж үйлчилгээний ерөнхий газар, Нийгмийн даатгалын ерөнхий газар, Гааль татварын ерөнхий газрын үйлчилгээг авахдаа цахим гарын үсгээ ашиглаж болох аж.

Иргэн бүрийг цахим гарын үсэгтэй бол гэж шаардахгүй аж. Харин өөрсдөө хүссэн тохиолдолд цахим гарын үсгээ Бүртгэл статистикийн ерөнхий газрын салбар нэгжүүдээс авч, иргэний үнэмлэх дээрээ бичилт хийлгэх шаардлагатай юм.

Цахим гарын үсгийг иргэд нэг жилийн хугацаатай 5000 төгрөгөөр авна. Харин албан байгууллага, бизнесийнхэн төрлөөсөө хамаарч цахим гарын үсгийг 40-230 мянган төгрөгөөр авах юм байна.