Өвөрхангай аймгийн Хархорин сумын Шанх баян Өлзийт овоо гэдэг газарт эмэгтэйчүүдийг олон удаа хутгалж танхайраад зугтаасан онц ноцтой хэрэг өнгөрсөн амралтын өдөр буюу энэ сарын 21-ний өдөр гарчээ.

Тодруулбал, тус газарт оршин суух 46 настай эрэгтэй Б нь тус сумын харьяат 34 настай эмэгтэй А-г хүчиндэхийг завдаж, цээжинд нь нэг удаа, мөн 45 настай С-ийг гар болон гуянд нь нэг удаа, 57 настай эмэгтэй Ц-г хэвлийд 1 удаа, 32 настай эрэгтэй Э-гийн толгойд 6, цээжинд нь 4 удаа хутгалж, хүнд гэмтэл учруулан танхайраад зугтсан байна. Хэргийг тус аймгийн хэлтсийн дарга, д/х Б.Очирдоржийн ахалсан бүрэлдэхүүн түргэн шуурхай илрүүлж, гэмт этгээдийг баривчилжээ. Хэргийг цагдаагийн байгууллага шалгаж байна. Гэмтэл авсан хохирогчдод яаралтай тусламж үзүүлж, ГССҮТ-д авч ирсэн эмчлүүлж байгаа аж.

Сэжигтэн этгээд нь өс хонзонгийн сэдэлтээр энэхүү хэргийг үйлдсэн байж магадгүй гэдгийг эх сурвалж мэдээлэв.

Өвөрхангай аймгийн Хархорин суманд дөрвөн хүнийг хутгалж, хүндээр гэмтээсэн хэрэг гарсан талаар бид мэдээлсэн. Тэгвэл эл хэргийг Өвөрхангай аймгийн Бүрд суманд 1970 онд төрсөн 46 настай, боловсрол мэргэжилгүй, оршин суух тодорхой хаяггүй Б гэгч үйлджээ. Тэрбээр малчин Э-ийнд туслах малчнаар ажилладаг байсан аж.

Энэхүү хэргийг үйлдсэн Б гэгч өмнө нь онц ноцтой гэмт хэрэг үйлдэж, чанга дэглэмтэй хорих ангид 15 жилийн хорих ял эдэлсэн байсан байна. Тэрбээр энэ хугацаандаа мөн л хоёр хүнийг зэвсгийн чанартай зүйл ашиглан гэмтээж, ялаа нэмүүлж байсан рецедив гэмт хэрэгтэн байжээ.