ГХЯ-аас өнөөдөр АСЕМ-ын бэлтгэл ажлын явц болон БНХАУ руу түүхий мах экспортолж эхэлсэнтэй холбоотойгоор мэдээлэл хийв.

Мэдээллийн үеэр АСЕМ-ын бэлтгэл ажлын талаар АСЕМ-ын бэлтгэл ажлыг зохион байгуулах хорооны орлогч дарга Б.Баясгалан “АСЕМ-ын зочдод 350 автомашин үйлчилнэ гэсэн урьдчилсан тоо гарсан. Үүнээс Улаанбаатарт үйл ажиллагаа явуулж байгаа хувийн хэвшлийн дистрибьютерүүдтэй хамтран 250 автомашиныг гаднаас оруулж ирэн татвараас чөлөөлж үнэ төлбөргүй хэрэглээд буцаах гэрээ хийсэн.

Мөн яам, Тамгын газар зэрэг төр захиргааны байгууллагуудын автомашиныг оролцуулна гэсэн төлөвлөгөөтэй байна. Түүнчлэн хувь хүмүүсийн эзэмшиж байгаа АСЕМ-д хэрэглэгдэж болохуйц автомашинуудын бүртгэл, үүнтэй холбоотой ажил явагдаж байна. Нэмж хэлэхэд, Зам тээврийн яам Сангийн яамтай хамтран нийтийн тээврийн үйлчилгээтэй холбоотой төсөл явуулж байгаа. Үүнтэй холбоотойгоор БНСУ-ын хөнгөлттэй зээлээр 300 гаруй том оврын автобус нийлүүлэхээр болсон. Эхний ээлжинд АСЕМ-д зориулж 50 автобус оруулж ирэхээр болоод байна” гэв.

Мөн тэрээр “Ирэх долоодугаар сарын 15,16-ны өдөр АСЕМ-ын хурал болохтой холбоотойгоор Улаанбаатар хотын замын хөдөлгөөнийг тогтвортой байх тал дээр ажиллах болно. Тодруулбал, Улаанбаатар дахь аялал жуулчлалын байгууллагуудтай хамтран ажиллаж гадны жуулчдыг эл өдрүүдээр хөдөө орон нутагт аялах хөтөлбөртэй болгох, нийслэлчүүдийг хөдөө орон нутагт амарч аялахыг уриална” гэсэн юм.

Түүнчлэн Монгол Улс албан ёсоор Говь-Алтайн Бургастайн боомтоор хонь, ямааны мах БНХАУ-д экспортолж эхэлсэн болохыг албаныхан онцолсон. Мах экспортлох зөвшөөрлийг мах боловсруулах гурван үйлдвэрт өгсөн бөгөөд эхний ээлжинд 1-2 машин мах гаргах бөгөөд цаашид замын нөхцөл байдлаас хамаарч экспортын хэмжээгээ тогтвортой нэмэхээр ажиллаж байгаа аж.