МАХН-ын дэргэдэх Ардчилал шударга ёс монголоын залуучуудын холбооны тэргүүн О.Буяннэмэх, Нарийн бичгийн дарга П.Амар болон тус холбооны удирдах зөвлөлийн гишүүд АТГ нь МАХН-ын дарга, удирдлагуудыг үе шаттайгаар хоморголон барьж хорих, шалгаж дарамтлах зэргээр улс төрийн хэлэмгдүүлэлтийг удаа дараа хийж байна гэж мэдээлж байсан. Улмаар Нэг нам, нэг хүн рүү чиглэсэн энэхүү зохион байгуулалттай хэлмэгдүүлэлт нь АТГ хэмээх байгууллага өөрөө улс төрийн нөлөөнд автсан, цаашид бие даан үйл ажиллагаа явуулах  ямар ч боломжгүй байгууллага болжээ гэж үзэж буйгаа илэрхийлсэн.

Тэд  АТГ-ын дарга, тэргүүн комиссар Н.Ганболдод “Сүүлийн жилүүдэд МАХН-ын дарга болон удирдлагуудыг ээлж дараалан үндэслэлгүйгээр баривчлан ял тулган шалгадаг, гэм буруу нь шүүхээр тогтоогдоогүй байхад гэмт хэрэгтэн мэтээр олон нийтэд зарлаж хүний эрхийг ноцтойгоор зөрчдөг явдал хэрээс хэтэрлээ. Иймд та бүхнийг шударга ёсыг тогтоох үйлсдээ улс төрийн эрх мэдэлтнүүдийн дарамт шахалтгүйгээр үнэнч шударгаар ажиллаж, МАХН-ын дарга Н.Энхбаярыг ялтай мэтээр зарлаж хэлмэгдүүлэхээ зогсоож, намын удирдлагуудыг суллахыг шаардаж байна” гэх шаардлагыг хүргүүлсэн.

Тэгвэл Авлигатай тэмцэх газарт хаяглан ирүүлсэн МАХН-ын дэргэдэх Ардчилал, шударга ёс, Монголын залуучуудын холбооны шаардлагын хариуг өчигдөр хүргүүлсэн байна.

   Уг албан бичигт “Авлигатай тэмцэх газар нь авлигын эсрэг олон нийтийг соён гэгээрүүлэх, авлигаас урьдчилан сэргийлэх, авлигын гэмт хэргийг илрүүлэх зорилгоор гүйцэтгэх ажил, хэрэг бүртгэлт, мөрдөн байцаалт явуулах, энэ хуульд заасан этгээдийн хөрөнгө, орлогын мэдүүлгийг хянан шалгах чиг үүрэг бүхий хараат бус, бие даасан, төрийн тусгай байгууллага юм. Авлигатай тэмцэх газрын албан хаагчдын үйл ажиллагаа нь зөвхөн хуульд захирагдаж явагддаг. Хэн нэгэн хувь хүн, аль нэг үзэл санаа, намыг улс төрийн захиалгаар дарамтлах, хэлмэгдүүлэхэд үйл ажиллагаагаа чиглүүлдэггүй, Эрүүгийн хууль, Эрүүгийн байцаан шийтгэх хуульд заасан үндэслэл, журмын дагуу албан тушаалын гэмт хэргийг илрүүлэх, мөрдөн шалгах чиг үүргийг хэрэгжүүлж ирсэн. Хэрэв та бүхний хувьд тодорхой байцаан шийтгэх ажиллагааны явцад хүний эрх зөрчигдсөн гэж үзэж байгаа бол зохих байгууллагад хандан асуудлыг шийдвэрлүүлэх нь нээлттэй.

   Авлигын эсрэг хуулийн 16 дугаар зүйлийн 16.2-т “Аливаа албан тушаалтан, хувь хүн, хуулийн этгээд Авлигатай тэмцэх газрын үйл ажиллагаанд нөлөөлөх, хөндлөнгөөс оролцох”-ыг хориглосон. Шаардлагыг хүлээн авч шийдвэрлээгүй тохиолдолд шат дараалсан тэмцлийн хэлбэрт шилжих тухай танай мэдэгдэл нь өөрөө байгууллагын хэвийн үйл ажиллагаанд нөлөөлөх улс төрийн шинжтэй дарамт шахалт гэж ойлгогдохоор байна. Улс төрийн намын дэргэдэх залуучуудын байгууллагын зүгээс тус газрын үйл ажиллагаанд нөлөөлөх, авлига, албан тушаалын гэмт хэргийн мөрдөн байцаалтын ажиллагаанд саад учруулахаар оролдож, намын удирдлагуудыг суллахыг шаардсан зэрэг нь Эрүүгийн хуулийн 245 дугаар зүйлд заасан гэмт хэргийн шинжийг агуулж байгаад дүгнэлт хийнэ үү. Авлигатай тэмцэх газар авлигатай тэмцэж, нийгэмд шударга ёсыг тогтоох үйлсэд зөвхөн хуульд захирагдан өөрийн бүрэн эрх, чиг үүргийг хэрэгжүүлэн ажиллаж байна” гэжээ.

Д.Ундрах /24tsag.mn/