Баянзүрх дүүрэгт 19 жилийн өмнө гарсан хүн амины ноцтой хэргийг цагдаагийн байгууллагынхан олон жил тасралтгүй эрэн сурвалжилсны дүнд илрүүлэн, сэжигтнийг нь өнгөрсөн бямба гаригт саатуулжээ. 

Тодруулбал, 1997 оны наймдугаар сарын 5-нд Баянзүрх дүүрэгт оршин сууж байсан Э цээжиндээ дөрвөн удаа хутгалуулан амиа алдсан хэрэг гарсан аж. Тус дүүргийн Цагдаагийн хэлтсийнхэн тухайн үед хэргийн газарт үзлэг хийсэн ч гэмт хэргийг үйлдсэн байж болзошгүй хүний талаар хангалттай ул мөр олж чадаагүй байна. Үүсгэсэн эрүүгийн хэргээ сэргээж, түдгэлзүүлж явсаар өнгөрсөн оны сүүлчээр Улаанбаатар хотын Цагдаагийн газрын Гэмт хэрэгтэй тэмцэх албаны Онд хүнд гэмт хэрэгтэй тэмцэх хэлтсийнхэн дахин шалгах болсон байна. Эрүүгийн төлөөлөгчид нь хэрэгт ач холбогдол бүхий нэлээд чухал сэжүүр олж, лавшруулан судалсны эцэст уг хэргийг Б гэх эмэгтэй үйлдсэн болохыг баталж чаджээ.

Ингээд сэжигтэй этгээдийг эрэн сурвалжлахад хил давж Турк рүү явсан болох нь тогтоогдсон байна. Улмаар хил дээр хяналт тавьж, хоёрдугаар сарын 27-нд Буянт-Ухаа боомтоор орж ирэхэд нь саатуулан ШШГЕГ-ын харьяа Цагдан хорих 461 дүгээр ангид хорьсон байна.

Сэжигтэн нь 1975 онд төрсөн, хэрэг үйлдэх үедээ 22 настай байсан бөгөөд талийгаачтай ямар холбоотой байсныг хууль хяналтын байгууллагынхан одоогоор нууцалж буй юм. Сэжигтэн эмэгтэй өмнө нь хоёр ч удаа эрүүгийн хэрэгт холбогдож, шүүхээр шийтгүүлж байсан ч 1997 онд гарсан дээрх хүн амины хэрэгт огт шалгуулж байгаагүй аж. Тэрбээр 2000 болон 2010 онд хүн хутгалсан хэрэгт холбогдож байжээ.

Харин эх сурвалжийн мэдээлж буйгаар сэжигтэн эмэгтэй биеэ үнэлэдэг нэгэн байсан аж.